O RC DEPORTIVO CELEBRA A SEGUNDA XUNTANZA DO FORO SOCIAL CO NOVO HIMNO E A CAMPAÑA DE ABONOS COMO ASUNTOS PRINCIPAIS

O Real Club Deportivo celebrou este luns 6 de xullo no Estadio ABANCA-RIAZOR a segunda reunión do Foro Social, o espazo de encontro, escoita e participación impulsado polo Club para reforzar o diálogo directo coa súa masa social e compartir coa afección diferentes asuntos relevantes para o presente e o futuro da entidade.Nesta segunda edición, celebrada nun momento especialmente significativo para o deportivismo, co regreso do primeiro equipo a Primera División e no marco das iniciativas vencelladas ao 120 aniversario do Club, as persoas asistentes puideron coñecer novos detalles sobre dúas cuestións de especial interese: a preparación do novo himno oficial do RC Deportivo e as principais novidades da campaña de abonos da vindeira temporada.Durante o encontro, o Club compartiu coas persoas participantes o proceso de creación do novo himno do RC Deportivo, escrito e composto polo músico coruñés Xoel López. A canción nace coa vontade de representar o sentimento do deportivismo cara ao seu equipo e de conectar con algúns dos valores que definen ao Dépor: paixón, orgullo de pertenza, identidade local, esforzo, talento e teimosía.O proxecto busca contar ademais coa colaboración de diferentes artistas e formacións vencelladas á Coruña e a Galicia, polo que se consultou ás persoas membros do Foro sobre posibles nomes que poderían formar parte desta peza coral, aberta e representativa da diversidade do sentimento blanquiazul.A segunda parte da reunión estivo dedicada ás principais novidades dos abonos da temporada 2026-27. O Club trasladou ás persoas asistentes as liñas xerais dunha campaña que incorporará novas vantaxes e novas modalidades, co obxectivo de adaptarse mellor ás distintas realidades da afección deportivista e de seguir fortalecendo o vínculo entre o equipo e unha masa social que volverá ter un papel decisivo en ABANCA-RIAZOR.Entre as novidades expostas atópanse medidas orientadas a mellorar a experiencia das persoas abonadas, ampliar as posibilidades de vinculación co Club e ofrecer alternativas máis flexibles para diferentes perfís de deportivistas. O RC Deportivo dará a coñecer proximamente todos os detalles da campaña, que volverá poñer en valor a forza dunha afección que acompañou o equipo de forma exemplar nos últimos anos e que será fundamental no regreso á elite do fútbol español.O Foro Social consolídase así como unha canle estable entre o Club e a súa masa social. A través deste espazo, o RC Deportivo quere escoitar, explicar e compartir cos deportivistas as decisións e iniciativas que forman parte dunha nova etapa de crecemento institucional, deportivo e social. O Club agradece a participación de todas as persoas asistentes a esta segunda reunión e reafirma a súa vontade de seguir construíndo, xunto coa súa afección, un Dépor cada vez máis aberto e participativo.