O RC DEPORTIVO CONDENA OS ACTOS VANDÁLICOS OCORRIDOS EN ABANCA-RIAZOR

O RC Deportivo quere agradecer o extraordinario apoio recibido por decenas de miles de deportivistas durante unha xornada histórica para a nosa entidade. A celebración vivida en ABANCA-RIAZOR tras a consecución do ascenso a Primeira División constitúe unha mostra inequívoca da paixón, do sentimento de pertenza e do compromiso dunha afección que acompañou o Club nos momentos máis difíciles e que foi determinante neste camiño de regreso á máxima categoría do fútbol español. Precisamente por respecto a esa inmensa maioría de deportivistas que celebrou o éxito de forma exemplar, o Club considera necesario manifestar con absoluta claridade a súa máis firme condena aos actos vandálicos e comportamentos irresponsables rexistrados tras a finalización do encontro. As avaliacións realizadas durante as últimas horas permitiron constatar danos de consideración en diferentes instalacións do estadio. Entre eles, 752 asentos retirados ou arrincados —unha cifra moi superior á media de 50 asentos danados que habitualmente se rexistran durante unha tempada completa—, desperfectos en distintos elementos patrimoniais do recinto, danos na contorna do museo do Club, así como afectacións no terreo de xogo derivadas dos arrincamentos e arredor de quince zonas queimadas polo uso de bengalas. Alén do importante prexuízo económico e material ocasionado, o RC Deportivo quere subliñar especialmente a gravidade duns comportamentos que puxeron en risco a seguridade de miles de persoas, incluídas numerosas familias e menores presentes no estadio. A invasión masiva do terreo de xogo, o uso de material pirotécnico e determinadas accións desenvolvidas durante os festexos xeraron situacións potencialmente perigosas que nunca deben formar parte dunha celebración deportiva. Así mesmo, o Club considera especialmente preocupante que estes feitos obrigasen a realizar actuacións urxentes de reparación e acondicionamento en ABANCA-RIAZOR a escasos días da celebración do encontro internacional que disputarán as seleccións de España e Iraq o vindeiro xoves. Unha circunstancia que xerou unha situación innecesaria de incerteza e que puxo en risco a correcta organización dun evento deportivo de carácter internacional para a cidade da Coruña. Ademais, os incidentes rexistrados expoñen o RC Deportivo a posibles procedementos sancionadores que poderían derivar tanto en importantes multas económicas como en medidas que afecten ao peche parcial do estadio. ABANCA-RIAZOR é a casa de todos os deportivistas e un patrimonio común construído durante xeracións. A súa conservación esixe responsabilidade, respecto e civismo por parte de todos. Ser un club de Primeira División implica tamén proxectar unha cultura de respecto cara ás instalacións, cara ás normas de convivencia e cara ao conxunto de persoas que forman parte da experiencia do fútbol. O RC Deportivo continuará colaborando plenamente coas autoridades competentes e cos organismos responsables da seguridade para identificar os responsables dos actos vandálicos producidos durante a celebración. Paralelamente, o Club está a cuantificar a totalidade dos danos ocasionados e a estudar as medidas disciplinarias, económicas e administrativas que poidan corresponder en cada caso. Celebrar un éxito deportivo é perfectamente compatible con respectar as normas, protexer a quen nos rodea e coidar aquilo que pertence a todos. O futuro que queremos construír para o Deportivo fundaméntase no orgullo, na paixón, na responsabilidade e no respecto. Ese é o deportivismo que representa o noso Club e a nosa afección.