O RC DEPORTIVO EXPRESA A SÚA PROFUNDA INDIGNACIÓN POLA ACTUACIÓN ARBITRAL SUFRIDA POLO DÉPOR ABANCA ANTE O FC BARCELONA

O RC Deportivo quere expresar publicamente a súa profunda indignación e desconformidade coa actuación arbitral rexistrada no partido disputado este domingo, 15 de novembro, entre o Dépor ABANCA e o FC Barcelona, correspondente á xornada 11 de Liga F, especialmente pola incomprensible xestión do tempo engadido, que tivo unha incidencia directa no desenvolvemento e no resultado final do encontro.Co marcador de 1-0, o equipo arbitral sinalou oito minutos de tempo engadido na segunda parte e informou de que estes comezarían a contabilizarse a partir do minuto 92. En consecuencia, o encontro debía finalizar no minuto 100. Con todo, de maneira incomprensible e inxustificable, o partido prolongouse ata o minuto 107, chegando o gol do empate do FC Barcelona no minuto 102, cando o tempo de prolongación inicialmente establecido xa se superara.O RC Deportivo considera que unha prolongación destas características, sen unha xustificación obxectiva que explique semellante ampliación do tempo anunciado, resulta inadmisible e compromete as garantías competitivas que deben rexer calquera encontro profesional.Esta situación adquire aínda maior gravidade se se ten en conta que se produce despois de dúas xornadas consecutivas nas que o Dépor ABANCA tamén se viu prexudicado por decisións arbitrais. Son, polo tanto, tres xornadas consecutivas nas que as actuacións arbitrais tiveron consecuencias negativas para os intereses deportivos do noso equipo.O RC Deportivo é un firme defensor e impulsor do fútbol feminino. O noso compromiso co seu crecemento e profesionalización non se limita ás declaracións, senón que se demostra con feitos. Unha das expresións máis claras desta aposta é que o Dépor ABANCA disputa os seus encontros como local en ABANCA RIAZOR, o estadio do deportivismo, ofrecendo ao fútbol feminino o espazo, a visibilidade e a dimensión que merece.Nesta ocasión, máis de 4.000 persoas presenciaron en directo o sucedido e foron testemuñas do atropelo sufrido polo noso equipo. Unha afección que acudiu a apoiar o Dépor ABANCA e que merece, como as nosas futbolistas e o noso club, o máximo respecto e unhas condicións de competición xustas.O fútbol feminino merece o mesmo nivel de profesionalidade, esixencia e garantías competitivas que calquera outra competición. Non se pode construír o seu crecemento sen abordar con responsabilidade unha cuestión tan determinante como a calidade da arbitraxe, a coherencia dos criterios aplicados e a confianza dos clubs no funcionamento da competición.Por todo iso, o RC Deportivo considera imprescindible que os organismos competentes analicen o sucedido, ofrezan as explicacións oportunas e adopten as medidas necesarias para evitar que situacións como esta volvan repetirse.O noso compromiso co fútbol feminino é firme e irrenunciable. Precisamente por ese compromiso, o RC Deportivo non vai permanecer en silencio ante actuacións que prexudican as súas futbolistas, condicionan o desenvolvemento da competición e danan a credibilidade dunha modalidade que necesita seguir medrando coas máximas garantías.