O RC DEPORTIVO HABILITA UNHA OPCIÓN ONLINE PARA A RENOVACIÓN DOS ABONOS DE MARATHON INFERIOR

O RC Deportivo habilitará un procedemento online previo para que as persoas abonadas de Marathon Inferior poidan iniciar a renovación do seu abono para a temporada 2026-27 sen necesidade de acudir inicialmente á Oficina de Atención ao Deportivista.Esta decisión responde ás consultas, comentarios e solicitudes recibidas nos últimos días por parte de abonados desta zona do estadio. O Club escoitou esas achegas e traballou para atopar unha solución que facilite o trámite, reduza desprazamentos iniciais e, ao mesmo tempo, permita cumprir coas medidas reforzadas de identificación, control e aceptación expresa das condicións particulares de Marathon Inferior.O obxectivo do RC Deportivo é claro: que Marathon Inferior estea chea, ordenada e protexida desde o primeiro partido en Primera División.O RC Deportivo mantén, ademais, un compromiso firme coa tolerancia cero fronte a calquera forma de violencia e coa garantía dun contorno seguro, respectuoso e acorde cos valores do deportivismo. Marathon Inferior debe seguir sendo un espazo de animación, paixón e apoio incondicional ao equipo, sempre dentro do respecto, da convivencia e do cumprimento das normas.A aplicación de condicións específicas para esta zona non responde a unha vontade de limitar a animación nin de sinalar ás persoas abonadas, senón precisamente de preservar a súa continuidade, garantir que cada abonado ocupa a localidade que lle corresponde e evitar que condutas individuais ou usos indebidos poidan derivar en prexuízos colectivos.O regreso a Primera División esixe maiores estándares de orde, seguridade e control. Neste contexto, o Club considera imprescindible anticiparse e adoptar medidas que permitan protexer tanto ás persoas abonadas como ao propio equipo. A correcta identificación dos titulares do abono garante que cada localidade corresponde ao seu abonado, evita usos indebidos de carnés e permite individualizar responsabilidades cando sexa necesario.Nas últimas temporadas, o Club tivo que afrontar sancións e expedientes que supoñen un risco económico e deportivo relevante. As sancións xa firmes acadan os 90.000 euros e os expedientes abertos durante a tempada elevan a exposición por riba dos 340.000 euros.Alén do impacto económico que estas sancións supoñen para o Club (recursos que poderían destinarse ao proxecto deportivo, ao cadro de xogadores ou á mellora dos servizos ao abonado), o RC Deportivo quere que o seu regreso a Primera División sexa tamén un exemplo de respecto, convivencia e comportamento responsable ante todas as afeccións.Por iso, protexer Marathon Inferior é tamén protexer o Deportivo. Unha zona correctamente ordenada, identificada e segura é unha zona máis forte e con maiores garantías de continuidade.O novo procedemento online permitirá ás persoas abonadas asinar dixitalmente a Declaración de Aceptación Expresa das Condicións Particulares do Abono de Marathon Inferior e achegar a documentación identificativa requirida. Unha vez validada pola Oficina de Atención ao Deportivismo, poderán completar a renovación e o pago polas canles habituais, a través da App ou da web oficial.O abono quedará inicialmente en estado "Pendiente de activación" ata que o titular acuda á Oficina de Atención ao Deportivista e presente o seu documento de identidade orixinal. Nese mesmo momento, se solicitou o abono físico, entregaráselle en man.Deste xeito, o Club facilita o proceso sen renunciar ás garantías necesarias. Mantense a comprobación presencial final como requisito imprescindible para a recollida do abono, pero permítese avanzar previamente na sinatura, no envío de documentación e no pago da renovación por vía online.O RC Deportivo agradece a comprensión, a colaboración e as achegas recibidas durante estes días. O propósito do Club é que os 4.000 abonados de Marathon Inferior estean no seu sitio desde o primeiro partido en Primera, formando parte dun ABANCA-RIAZOR cheo, forte e unido.¡Forza Dépor!