UN DÉPOR ABANCA «DESEXANDO QUE ARRANQUE A LIGA» ESTRÉASE ESTE SÁBADO 29 ÁS 12:00 EN ABANCA-RIAZOR ANTE O SEVILLA FC

O Dépor ABANCA estrea a súa terceira temporada consecutiva na Liga F coa visita do Sevilla FC a ABANCA-RIAZOR este sábado 29 de agosto ás 12:00 (Dazn, Teledeporte e RTVE Play).As Nosas chegan á competición oficial tras un intenso verán de movementos no cadro de xogadoras.En primeiro lugar, o equipo selou a continuidade de Espe Pizarro, Paula Novo, Merle Barth, Redru e Lucía Rivas.Alberto Rodríguez, que se estrea no banco, conta ademais coas novas fichaxes de Andrea Tarazona, Adriana Ranera, Sofía Domínguez, Lucía Pardo, Vega Montesinos, Eva Alonso, Daniela Caracas e Ainoa Gómez; ademais de Inês Pereira e Marisa García, ambas xa en propiedade despois de concluíren as súas respectivas cesións.A elas hai que sumar incorporacións con licenza do B que tamén achegarán o seu gran de area, como é o caso de Paula Hernández, Carla Castyñeiras ou Karla Bermejo.O Dépor ABANCA pechou a pretemporada con vitorias ante o Sporting de Gijón (9-0), de Segunda Federación, e o FC Porto (2-0) e o Río Ave FC (1-2), da Primera División de Portugal; un empate ante o Athletic Club (0-0); e unha derrota ante o Real Madrid CF (2-1).O técnico deportivista asegura estar "moi contento a nivel colectivo e individual. Fomos progresando nos aspectos que tiñamos pensado implantar ao longo da pretemporada. Iso quedou referendado nos partidos. Estamos contentos e desexando que arranque a liga".Perde o partido Merle Barth, que "arrastraba uns problemas da temporada pasada. Está na última fase da recuperación, a piques de incorporarse ao grupo. É unha xogadora importante para o equipo e estamos desexando que chegue".Tampouco poderán xogar Marisa García e Ainoa Gómez, concentradas coa selección española sub-20: "Calquera ausencia sempre trastoca. É algo que non depende de nós nin delas mesmas. Agora que vivan a experiencia, que traten de gañar o Mundial, e nós centrámonos nas xogadoras que temos, aínda que desexando que cheguen e se incorporen de novo".

Pola súa banda, o Sevilla FC acabou a temporada pasada na 8ª posición con 41 puntos.A exdeportivista Esther Sullastres, agora capitá do conxunto andaluz, quere esta temporada «ser máis intensas, gañar moitos máis duelos. A liga igualouse moito, todos os equipos estamos moito máis igualados, pero marcará a diferenza quen dea ese pasiño adiante».Este verán, o Sevilla FC gañou ao Málaga CF Femenino de Segunda Federación (6-0) e ao Real Madrid CF (2-4); empatou co Granada CF (1-1) e co Sporting CP Femenino (0-0), da máxima categoría de Portugal; e caeu ante o UD Costa Adeje Tenerife (1-0) e o London City Lioness (0-2), da Primera División de Inglaterra.Pola súa banda, David Losada, técnico hispalense, pensa que o Dépor ABANCA «fichou moi ben. É certo que é un equipo novo, pero con xogadoras que proceden de primeiros equipos. É un equipo moi competitivo. Xa o ano pasado, malia o 0-4, custounos moitísimo. Foi un deses partidos nos que tes esa efectividade, pero non foi tan contundente como reflectiu o resultado. Puxéronnolo moi difícil».Advirte de que «imos atopar un cadro de xogadoras moi agresivo, que o fai moi ben, e o seu adestrador coñéceas. É un dos asistentes que estivo con Fran Alonso, que coñece o grupo, coñece a casa e coñece a liga. E iso vai engadir dificultade».Unha vez rematado o encontro, As Nosas adestraranse o domingo 30 de agosto ás 11:00 no Dépor Training Center.