AUBAMEYANG CONFIRMA TRAS RECOLLER O PREMIO ESTRELLA GALICIA QUE "CADA DÍA ESTOU MELLORANDO", AÍNDA QUE PREFIRE "IR POUCO A POUCO"

Pierre-Emerick Aubameyang asegurou tras recoller o Premio Estrella Galicia ao mellor xogador do mes de setembro que "cada día estou mellorando. Xa deixei as muletas. Estou camiñando pouco a pouco. Estou empezando coa bici".Insiste en que "o máis importante é non sentir molestias no xeonllo e, polo momento, todo ben".O dianteiro deportivista quere na súa recuperación "ir pouco a pouco. O que vai determinar o tempo será cando saia ao campo correr. Isto é o máis importante. Aí podes ver as sensacións, como estás de verdade. Polo momento estou no ximnasio. Estou facendo bicicleta, o Tour de Francia", chancea.Confirma que as previsións médicas "son de entre 6 e 8 semanas. Polo momento vai mellorando día a día".'Auba' decatouse da súa lesión durante o partido ante o Real Betis: "Era un córner. Levantei a perna dereita para despexar o balón e, ao caer, fíxenme dano aí. Pensei que igual pasaba. Nos minutos seguintes non podía esprintar ao 100 %. Aí pensei que tiña pinta de que algo non estaba ben. Despois do partido, como estás en quente, non o sentes moito, pero ao día seguinte erguinme fatal".O futbolista francés asegura que é a primeira vez que se lesiona e, por iso, “cando o doutor me dixo que tiña que facer unha artroscopia foi un pouco duro mentalmente; pero teño unha familia que está comigo. Os meus irmáns viñeron desde Italia. Os primeiros días foron así, así, pero cando chegou a miña familia, todo ben". "Agora teño un xeonllo novo e toca empezar de novo", chancea entre risas.Finalmente, preguntado por Nsongo Bil, único dianteiro do primeiro equipo dispoñible agora mesmo para Antonio Hidalgo, Aubameyang comenta que "el só vale por 2 dianteiros, co físico que ten. Non ten que deixarse levar pola presión de 'teño que facer non sei que'. O máis importante é seguir xogando como o está facendo, porque está axudando moitísimo ao equipo. E que non dubide, porque os goles chegan moi rápido. Xa marcou coa selección e isto é bo para a confianza. Estou contento por el, polo que fai, porque é un rapaz moi humilde, que escoita moito".