DANIELA CARACAS, TALENTO, EXPERIENCIA E ILUSIÓN PARA REFORZAR AO DÉPOR ABANCA

O Dépor ABANCA continúa dando forma a un proxecto ilusionante coa incorporación de Daniela Caracas González (Cali, Colombia, 25 de abril de 1997), que se converte en nova xogadora branquiazul ata xuño de 2028.A futbolista colombiana chega a A Coruña para achegar experiencia, solidez e personalidade á liña defensiva do equipo, iniciando unha nova etapa coa ilusión de vestir unha camiseta cargada de historia e de seguir medrando xunto ao Club.Daniela aterra no Dépor procedente do RCD Espanyol, onde a pasada tempada foi unha das futbolistas con maior protagonismo do equipo ao disputar 24 encontros de Liga F, 22 deles como titular, demostrando a súa regularidade e fiabilidade sobre o terreo de xogo.A súa traxectoria no fútbol español comezou na tempada 2019-20, cando chegou ao DUX Logroño, iniciando un camiño que lle permitiu consolidarse como unha futbolista de referencia grazas ao seu compromiso, á súa capacidade competitiva e á súa constante evolución.A nivel internacional, Daniela tamén defendeu a camiseta de Colombia, participando en grandes citas do fútbol continental como a Copa América Femenina de 2018 e 2022, experiencias que enriquecen aínda máis o perfil dunha xogadora afeita a competir ao máximo nivel.Agora, unha nova historia comeza para Caracas en ABANCA-RIAZOR. Un novo escudo, unha nova afección e un mesmo obxectivo: seguir medrando e axudar ao Dépor ABANCA a acadar as súas metas.