ADRIÀ ALTIMIRA VESTIRÁ DE BRANQUIAZUL ATA 2029

Hai xogadores que necesitan anos para conectar coa súa afección. E hai outros que, desde o primeiro día, están destinados a entenderse con ela. Adrià Altimira é un deses casos.O RC Deportivo e Adrià Altimira Reynaldos (Cardedeu, Barcelona, 28 de marzo de 2001) chegaron a un acordo para ampliar a súa vinculación até xuño de 2029, prolongando así a historia dun futbolista que, en apenas uns meses, gañou o cariño e o recoñecemento do deportivismo.Tras chegar libre procedente do Villarreal CF en xaneiro deste 2026, o futbolista catalán aterrou na Coruña disposto a achegar traballo, enerxía e compromiso. O seu rendemento superou calquera expectativa. En media tempada, disputou 22 partidos en ABANCA-RIAZOR, repartiu 6 asistencias e deixou para o recordo un gol no desconto en Ceuta que valeu tres puntos fundamentais nun momento decisivo do campionato.Pero o seu impacto foi moito máis alá das estatísticas. Altimira destacou pola súa versatilidade, a súa capacidade de adaptación e a súa entrega constante. Primeiro como lateral e despois como centrocampista pola banda dereita, asumiu cada reto con personalidade e xenerosidade, converténdose nunha peza fundamental para o equipo.A súa conexión coa bancada foi inmediata. O esforzo en cada acción, o seu carácter competitivo e a súa identificación co escudo levárono a converterse nun dos futbolistas máis queridos polo deportivismo, un recoñecemento que tamén quedou reflectido nos dous premios Estrella Galicia ao mellor xogador do mes recibidos durante a súa etapa como blanquiazul, nun galardón que elixen ao alimón os medios de comunicación e ANOSAFORZA.Formado na canteira do FC Barcelona, a súa traxectoria levouno polo NK Lokomotiva, a UD Melilla, o FC Andorra, o Villarreal CF e o CD Leganés, acumulando experiencia en diferentes escenarios do fútbol profesional. Un percorrido que lle permitiu medrar como futbolista e que hoxe pon ao servizo dun proxecto no que atopou o seu sitio.Con 34 partidos en LaLiga EA Sports, 85 en LaLiga Hypermotion, 14 na Copa del Rey e experiencia tamén en competición europea co Villarreal CF, Adrià continuará escribindo unha carreira marcada polo traballo e a ambición.Con esta renovación até 2029, o Dépor asegura a continuidade dun futbolista que representa á perfección o espírito deste equipo: compromiso, sacrificio e paixón por cada balón.Adrià Altimira seguirá defendendo a camiseta branquiazul e o deportivismo seguirá gozando dun deses xogadores que fan sentir orgullo dentro e fóra do campo.