FRAN ALONSO: "TEMOS QUE ASUMIR QUE É UN PARTIDO NO QUE IMOS SUFRIR"

Fran Alonso advertiu na sala de prensa do Dépor Training Center que ante o FC Barcelona este domingo 15 de marzo ás 12:00 horas (Dazn, GOL, TEN, TVG e 3Cat) en ABANCA-RIAZOR "primeiro temos que asumir que é un partido no que imos sufrir. Temos que saír ao campo preparadas para sufrir, preparadas para facer moitísimos esforzos, constantes".Do Barça o técnico deportivista recalca que "ten moitísimo ritmo de xogo, os reinicios son moi rápidos, hai moi poucos momentos para descansar; a non ser que teñamos bo trato de balón, posesións longas..."Explica que o Dépor ABANCA "tentará minimizar o seu potencial, que é moi difícil. E logo tentar facerlles dano nas poucas debilidades que teñen. E sobre todo en momentos con balón tentar impor o noso xogo sabendo que é moi difícil".A pesar do reto, "para nós é un partido moi bonito. Estamos a desexar probarnos. Estamos no mellor momento da temporada. Queremos probarnos e que mellor que ante un dos mellores equipos do mundo senón o mellor. Así que estamos con moitísimas ganas de que chegue o partido".