PAULA NOVO, TALENTO DO DÉPOR TRAINING CENTER CON FUTURO BRANQUIAZUL ATA 2028 XA NO PRIMEIRO EQUIPO

O crecemento dun Club tamén se mide polas futbolistas que percorren o camiño desde a base ata converterse en protagonistas do presente. Paula Novo Saborido (Boiro, 13 de abril de 2005) seguirá formando parte dese camiño. A xogadora de Boiro renovou o seu contrato co RC Deportivo ata xuño de 2028 e, ademais, pasa a ter ficha do primeiro equipo, un novo paso nunha traxectoria marcada polo esforzo e a progresión constante.Desde a súa chegada á estrutura deportivista na tempada 2021-22, Paula foi dando pasos firmes na súa evolución, medrando como futbolista e demostrando en cada etapa o compromiso, a personalidade e a ambición que caracterizan as xogadoras formadas en Abegondo.A temporada recén rematada foi unha nova mostra da súa progresión. Capaz de competir ao máximo nivel e de asumir responsabilidades alí onde o equipo a precisou, alternou a súa participación entre o Dépor ABANCA en Liga F e o filial en Segunda Federación, contribuíndo en ambos casos a acadar o obxectivo da permanencia.Na máxima categoría do fútbol español disputou 18 encontros, 9 deles como titular, confirmando a súa capacidade para competir entre as mellores. Ao mesmo tempo, continuou sendo unha peza importante no Deportivo ABANCA B, co que completou 11 partidos, todos eles desde o inicio.A historia de Paula co Dépor comezou moito antes. Os seus primeiros pasos no fútbol chegaron no Atlético Rivera Infantil e no CD Boiro, antes de incorporarse á familia branquiazul. Desde entón, o seu crecemento foi da man do Club, converténdose nun exemplo do talento que emerxe desde a canteira.Un dos momentos máis especiais dese percorrido chegou na tempada 2024-25, cando foi unha das futbolistas destacadas do Deportivo ABANCA B que logrou o histórico ascenso a Segunda Federación, un éxito que forma parte xa da historia recente da sección.Agora, esa evolución atopa un novo recoñecemento. A súa renovación e a súa incorporación definitiva ao primeiro equipo reflicten a confianza do Club nunha futbolista que soubo gañar cada oportunidade con traballo, constancia e rendemento.Con apenas 21 anos, Paula representa presente e futuro. Unha futbolista de ANOSACANTEIRA, identificada co escudo e cun amplo marxe de crecemento por diante.O RC Deportivo celebra a continuidade dunha xogadora que encarna o esforzo, a constancia e a ilusión de toda unha xeración de futbolistas branquiazuis. Paula Novo seguirá medrando como branquiazul ata 2028, xa como integrante de pleno dereito do primeiro equipo.