Joselu e Bruno Gama, os dous goleadores esta noite copeira en Riazor, foron os protagonistas na zona mixta do Estadio de Riazor.
Así, o dianteiro galego prefire quedar co positivo do empate a dous final: "Os partidos non saen ben desde o principio. Ao final o equipo soubo ir cara adiante. Estamos a xogar en casa, temos que sumar. O equipo fixo un esforzo excelente para conseguir un bo resultado".
Explicou a rabia expresada na celebración do seu gol, que supoñía a igualada: "Xogara tres partidos en Riazor. No primeiro rompinme o xeonllo, noutro fallei un penalti. É un pouco a rabia contida que un ten dentro. Sobre todo por significar o empate. Un expresa un pouco a satisfacción de marcar un gol neses minutos".
Asegurou Joselu ter "totalmente esquecida" a lesión de xeonllo. "Psicoloxicamente non me afecta para nada", engade.
Pola súa banda, Bruno Gama, que iniciou a remontada do Deportivo cun gran gol nunha bonita xogada persoal, confesa estar "moi contento. Os atacantes vivimos do gol. E ademais logramos remontar".
Subliña que "queremos seguir na Copa do Rey" e apunta que a eliminatoria "a vexo ao cincuenta por cento. Somos dous equipos bos que van disputar un partido e pode pasar calquera cousa".
