Manuel Pablo, adestrador do Xuvenil A, e Hugo Baldomar, capitán do equipo, compareceron esta mañá na sala de prensa de ABANCA-RIAZOR antes de subirse ao autocar rumbo a León, onde afrontarán mañá mércores ás 20:00 horas (Youtube RFEF) a segunda semifinal da Copa do Rei ante o UD Almería.
O técnico deportivista, 21 anos e 1 día despois de vivir a final de Copa no Santiago Bernabéu ante o Real Madrid, ve agora ao seu equipo "tranquilo, canso porque esta fin de semana tivemos un partido moi difícil en Bansander e o Fabril tamén xogou contra o RC Celta C. Máis que nerviosos vinos cansos. Pero sei que están moi ilusionados con este campionato e xa están a pensar niso. A pesar do cansazo, a ilusión supera a todo".
Hugo Baldomar apunta que no vestiario "hai moitas ganas de xogar. Desde o día seguinte ao partido contra o Villarreal CF xa só falabamos da Final Four. Igual é por iso que en liga tivemos un pouco de dúbidas, pero ultimamente vimos en moi boa dinámica tanto os xuvenís como o Fabril".
Manuel Pablo considera ao rival de mañá, o UD Almería, "un equipo moi competitivo. Esta fin de semana empatou contra o líder, o Betis. Fisicamente é forte, gaña moitos duelos, é un equipo moi compacto, con velocidade, ten moita verticalidad con espazos. Creo que tamén hai situacións que podemos aproveitar. É un gran rival, temos que estar preparados, temos que asumir riscos, pero temos que competir igual que contra os outros, sendo nós mesmos e tentando que esas fortalezas que ten o rival empequeñecelas".
Pedirá aos seus futbolistas no Estadio Reino de León "ir a polo partido pero mirando sempre ao rival, porque non podes deixar de mirar as súas fortalezas".
O atacante branquiazul, no Club desde o Benxamín B, asegura que "estamos preparados tanto mental como fisicamente para estes partidos. Xa o demostramos contra o RC Celta, o Atlético de Madrid e o Villarreal CF. Sabemos que arriba son moi rápidos, teñen 3 balas. Hai que xogar como sempre. Se nos poñemos por baixo como estes partidos ímolo a sacar. Estamos tranquilos, con moitas ganas".
O adestrador deportivista ten claro que hai que esquecerse dunha hipotética final porque "o que hai que mirar é o máis próximo e non pensar máis aló. Centrarnos no que temos, porque nos vai a poñer en dificultades o rival e só temos que centrarnos no partido de mañá. Ás veces a ilusión lévache a mirar moito máis lonxe do que tes en mente. Hai que ter claro que só temos que pensar no rival de mañá".
Valora "moi alto" o feito de que o Dépor, un equipo que actualmente milita en Primera Federación, coouse nesta Final Four xuvenil con outros 3 equipos do fútbol profesional, caso de UD Almería, Real Madrid CF e Athletic Club: "O ano pasado, cun cambio xeracional, puidémonos meter na Copa de Campións tamén como mellores segundos. Este ano estamos na Final Four de Copa. Os rapaces están a facer un traballo moi forte. Tentamos sacarlle, como todos os adestradores e como todas as canteiras, o mellor de cada un, tentándoos poñer no mellor dos contextos para que compitan o mellor posible e eles están a interpretar moi ben, deron un paso adiante tamén nesa crenza, talvez por ese título conseguido. Créronse un pouco máis tamén eles que poden competir contra os mellores. Valoro moi alto o que se está facendo por parte de todos".
Engade nesta liña que os canteiráns branquiazuis "deron un paso adiante en todos os sentidos e o traballo tamén se está vendo de moitos anos. Nós o que temos que facer é iso, que consigan render e mesmo que haxa rapaces que derruben a porta, que cun primeiro ano ou segundo ano poidan chamar a equipos superiores e é o que estamos a conseguir. O club é ao final o que ten que dar ese paso para poder eses rapaces tamén ter a súa oportunidade. Entendo as necesidades do Club, a urxencia que ten, pero sempre pode haber un pequeno espazo para eses rapaces que están a chamar".
Hugo Baldomar confesa que Manuel Pablo "nos di que cada partido é unha final e temos que saír ao campo coma se os outros equipos fosen os mellores, porque todos contra nós xogan ben. Temos unha sorte incrible de representar este escudo e creo que o estamos demostrando, que ten que estar aí arriba".
O atacante deportivista resalta que no equipo "todo o ano foi un crecemento continuo e agora mesmo estamos moi unidos".
Sentado ao seu lado na sala de prensa de ABANCA-RIAZOR, Hugo Baldomar destaca do seu adestrador, Manuel Pablo, que "nos di as cousas claras. Durante toda a semana prepara moi ben os exercicios, analizando ao rival. Dinos as súas fortalezas, as súas debilidades, como temos que facer..."
Manuel Pablo sostén que "buscamos sempre e desde o primeiro momento ser un equipo competitivo. Tomamos riscos e ás veces non nos sae ben. Pero sempre somos un equipo que quere ir buscar ao rival arriba. Sempre buscamos ter o noso protagonismo, pero ás veces non sae ben".
Considera importante o "día a día, o traballo constante, ser esixentes para non só os que están no once inicial, senón os que despois tamén poden saír durante o partido tamén, apoien, axuden a cambiar as cousas. É un día a día constante para que non baixen o nivel e para que estean sempre metidos no adestramento, porque eu creo que se es constante no adestramento tamén vas ser constante nos partidos".
A nivel particular, Manuel Pablo e o resto de adestradores de #ANOSACANTEIRA "sentímonos arroupados e sentímonos contentos. Para min que levo pouco, nese sentido síntome moi feliz co que me tocou, con este Xuvenil do ano pasado e o deste ano. Estamos a tentar facer as cousas ben. Estamos a tentar mostrarlles o camiño por onde teñen que seguir".
Non se pon na súa carreira nos bancos "aspiracións inmediatas. Se traballas ben cada cousa chegará máis tarde ou máis cedo. Por iso non me poño tampouco nin datas nin nada, senón ser feliz onde estou, facelo ben, demostrar que as cousas saen con traballo e xa está. Para min nesta categoría, que eles están nunha idade importante, darlles o mellor, tentar aconsellarlles e no día esixirlles para que dean o mellor de cada un e que poidan progresar en calquera lado".
Finalmente a #ANOSAFORZA, Hugo Baldomar, con case 10 anos en Abegondo, asegúralle que "imos dalo todo e tentaremos chegar o sábado a xogar esa final".
