RCD / NOVAS

O Dépor segue dando motivos para crer (0-0)

17/04/2018 22:42

Toda unha vida en 90 minutos. Con esa frase pódese resumir o sucedido esta tarde en ABANCA-RIAZOR, onde Deportivo e Sevilla non se deron tregua durante un só segundo: medio centenar de disparos a porta, penaltis non sinalados, tiros aos postes, uns minutos finais de tolos... Branquiazuis e sevillistas asinaron un partido que trepidante, dos que son difíciles de esquecer, dos que transcenden os límites da razón.

Só o fútbol pode ofrecer un duelo no que ambos os contendentes disparen 46 veces e non se mova o marcador. Fíxoo en 22 ocasións o Dépor, por 24 do Sevilla. E tamén é o único deporte no que, nas malas, os afeccionados dan aínda máis do que adoitan dar. O deportivismo acudiu á chamada do equipo e ABANCA-RIAZOR rexistrou unha das mellores entradas da temporada. E o que é mellor, un clima de ánimo nos catro custados do Estadio como facía tempo non se producía.

Clarence Seedorf, técnico branquiazul, mantivo practicamente o mesmo once que saltou ao céspede de San Mamés o pasado sábado. O preparador holandés realizou unha única modificación, ao saír do equipo Emre Çolak para dar entrada a Guilherme. Con ese cambio, Michael Krohn-Dehli pasou a ocupar unha posición máis avanzada do habitual, entre os tres centrocampistas e os dous dianteiros.

Nada máis comezar o encontro, Riazor estremeceuse co choque de cabezas entre Krohn-Dehli e Johannes Geis. Saíu peor parado o deportivista que, após controlar unha hemorraxia nasal, puido continuar no terreo de xogo.

O primeiro disparo a porta do partido chegou en botas de Miguel Layún. O lateral esquerdo sevillista puxo a proba a Rubén, cun lanzamento raso que o gardameta deportivista detivo en dous tempos, no minuto 4. Transcorridos catro minutos máis, foi Sandro quen o tentou, moi escorado. Rubén atallou sen apuros.

Na acción seguinte produciuse o primeiro achegamento branquiazul. Adrián cabeceou un centro de Luisinho que David Soria despexou a saque de esquina. Pouco despois, Lucas controlou un balón longo a pesar de levar literalmente colgado a Daniel Carriço. O seu pase posterior a Adrián cortouno a defensa visitante, sen que o colexiado volvese atrás na acción e sinalase a clara infracción do central portugués, que suporía unha moi boa oportunidade.

O Sevilla respondeu o minuto 14, nunha chegada polo extremo dereito de Sandro. O servizo por baixo do dianteiro canario rematouno ao primeiro toque Carlos Fernández. O canteirán sevillista estrelou o coiro no lateral da rede do marco herculino.

Catro minutos despois, Rubén evitou milagrosamente o tanto sevillista, ao rexeitar un remate no segundo pau de Guido Pizarro, nunha falta colgada por Geis.

No ecuador do primeiro tempo, Fabian Schär recuperou un balón en campo contrario e aventurouse na área sevillista. O suízo buscou o contacto con Gabriel Mercado. Hóuboo. Pero o colexiado estimou que non foi o suficiente como para castigar ao Sevilla con penalti.

Pedro Mosquera e Guilherme tiveron opcións de rematar a portería nos minutos seguintes. O primeiro, atopouse a pelota enriba e non puido armar un disparo en condicións. O seu frouxo remate raso rexeitouno facilmente a zaga andaluza. O segundo recolleu un rexeite botando a 25 metros da portería de David Soria. A súa volea marchouse moi por riba do traveseiro.

No minuto 29, Lucas dispuxo doutra boa opción de remate, esta dentro da área e ben centrada. O remate do '7' deportivista rexeitouno Carriço indo ao chan, o balón volveu golpear en Lucas, este dirixiuse cara á portería e, aínda que esquinado, non o fixo coa potencia necesaria para bater a David Soria.

A dez minutos do descanso, Adrián rematou de volea co interior do seu pé dereito un centro de Lucas desde a esquerda. O disparo, frouxo, detívoo o porteiro visitante sen excesivos problemas.

Inmediatamente despois, Seedorf viuse obrigado a realizar o seu primeiro cambio. As molestias de Krohn-Dehli tralo seu brutal choque con Geis non lle permitiron seguir. Emre Çolak entrou no terreo de xogo en lugar do danés.

O Sevilla gozou das súas mellores ocasións nos últimos cinco minutos. No 40, Banega cruzou en exceso o seu disparo após quedar practicamente só na frontal da área. No 43, Carlos Fernández quedou man a man con Rubén, que evitou o tanto. Xa co minuto de tempo engadido a piques de cumprirse, Albentosa rexeitou en última instancia un pase ao corazón da área nun contragolpe en superioridade numérica do conxunto de Nervión.

Nada máis comezar a segunda parte, Pedro Mosquera gozou doutra ocasión clara. Juanfran gañou a liña de fondo con claridade e deixou un balón preciso para a chegada do mediocentro ao punto de penalti. Con todo, non puido precisar o remate coa súa perna mala. A pelota marchouse ás nubes.

Instantes despois respondeu o Sevilla. Banega recuperou un balón preto da frontal. O arxentino non o pensou dúas veces. Buscou a cepa do poste esquerdo da meta de Rubén que, após unha gran estirada e en dous tempos, abortou o perigo. Tamén foi clara a opción do conxunto andaluz no minuto 51. O disparo de Correa, chegando desde atrás após deixada cara á media lúa de Carlos Fernández, marchouse a milímetros do mesmo pau que buscou Banega con anterioridade.

O Dépor deu réplica con celeridade, após un roubo de Borges nas inmediacións da área rival. A acción finalizouna Emre Çolak, buscando a escuadra máis lonxana. O coiro marchouse alto.

O Sevilla, no continuo intercambio de golpes, gozou doutra clara opción. Rubén desbaratouna após quedar cara a cara con Sandro, que recolleu un balón en profundidade de Geis.

No minuto 63, Schär rexeitou un remate de socato de Banega, xa desde dentro da área. Sarabia servira o balón desde o extremo dereito, onde chegara en posición dubidosa. O balón foise pola liña de fondo, a saque de esquina.

Após varias chegadas sen remate do Dépor, o Sevilla tentouno unha vez máis nun disparo lonxano. Miguel Layún, a perna cambiada desde o extremo esquerdo, buscou como anteriormente fixera na outra portería Emre Çolak. Co mesmo resultado, lanzamento lixeiramente alto.

Pouco despois, Adrián tivo unha ocasión manifesta. David Soria saíu á desesperada a tapar o cara a cara co dianteiro asturiano. Fíxoo, pero o esférico caeu a pé de Mosquera. O volante coruñés, outra vez coa súa perna mala, tratou de asegurar o golpeo co porteiro visitante case ao bordo da área e dous defensas situándose practicamente baixo paus. Con todo, o gardameta rozou o lanzamento de Mosquera, o suficiente para desviar a córner.

No minuto 77, Mercado cabeceou un córner por riba de Guilherme con suficiencia. A súa cabezada, moi centrada, caeu en mans de Rubén. Na seguinte acción, Emre Çolak desbordou a todo o mediocampo nervionense. O turco perfilouse para golpear colocado á entrada da área, pero o seu remate foi excesivamente frouxo e centrado, a mans de David Soria.

O tramo final do encontro foi unha auténtica tolemia, co Dépor índose con absolutamente todo en pos do gol que lle dese os tres puntos.

A cinco minutos do final, Lucas gozou doutra ocasión clara. Adrián peiteou no extremo esquerdo e deixou ao dianteiro cara a cara con Carriço. O coruñés desbordou ao defensa luso cara ao seu perfil dereito. O disparo, débil, coa súa perna mala, detívoo David Soria.

Lucas aínda volveu gozar de dúas accións parecidas. Na primeira, polo lado contrario da área, preferiu controlar coa sola e aguantar co corpo buscando o contacto con Carriço e un posible penalti. Na segunda, a última do partido, xogouna cun tiro desde a frontal da área. O coiro marchouse, por moi pouco, por riba do traveseiro.

Entre medias, co tempo case cumprido, chegou a 'ocasión'. Borges recolleu unha pelota morta ao bordo da área. O seu disparo coa perna esquerda repeleuno un defensa visitante. A pelota volveu caerlle ao costarriqueño, que insistiu coa esquerda. Esta vez o balón superou a todos, incluído o porteiro. Pero topouse coa base do poste esquerdo. Foi o 14º tiro ao pau do Dépor esta temporada, o 11º nos 11 partidos de Seedorf no banco branquiazul.

Con este empate, no primeiro encontro en que os branquiazuis deixan a súa porta a cero após sete xornadas sen facelo, o Deportivo suma 27 puntos, polos 31 do Levante. O conxunto valenciano, que ocupa a primeira posición fóra de descenso, recibe este xoves ao pechacancelas Málaga.

RC Deportivo: Rubén, Juanfran, Albentosa, Schär, Luisinho, Borges, Pedro Mosquera (Fede Valverde, min. 83), Guilherme (Bakkali, min. 80), Krohn-Dehli (Emre Çolak, min. 36), Lucas e Adrián.

Sevilla FC: David Soria, Jesús Navas, Carriço, Mercado, Layún, Geis, Pizarro, Sandro (Muriel, min. 76), Banega, Joaquín Correa (Sarabia, min. 57) e Carlos Fernández (Nolito, min. 68).

Árbitro: Medié Jiménez (c. catalán). Cartón amarelo a Banega (min. 11) e Layún (min. 74).

Incidencias: partido da 33ª xornada de LaLiga disputado no Estadio ABANCA-RIAZOR ante 24.652 espectadores.

RCD / J33 LaLiga Santander

  • Rubén
  • Luisinho
  • R. Albentosa
  • Juanfran
  • Fabian Schär
  • Guilherme (80')
  • Krohn-Dehli (36')
  • Pedro Mosquera (83')
  • Celso Borges
  • Lucas Pérez
  • Adrián

Suplentes

  • Andone
  • Emre Çolak (36')
  • Bakkali (80')
  • Borja Valle
  • Valverde (83')
  • Fernando Navarro
  • Maksym Kóval
  • David Soria
  • M. Layún
  • J. Navas
  • Carriço
  • Mercado
  • Sandro (76')
  • Banega
  • Correa (57')
  • Guido Pizarro
  • Johannes Geis
  • Carlos Fdez (68')

Suplentes

  • Arana
  • Sergio Rico
  • Pareja
  • Sarabia (57')
  • R. Mesa
  • L. Muriel (76')
  • Nolito (68')

Estadio

Estadio ABANCA-RIAZOR (24.671 espectadores)

Goles

    Árbitro

    David Medié Jiménez amoestou aBanega (11'), M. Layún (74') do Sevilla FC.

    RCD / Vídeo

    RCD / Vídeo

    RCD / Vídeo

    Valora a #osnosos no #DéporSevillaFC

    #ANOSAFORZA
    8,7
    RUBÉN
    7,8
    SCHÄR
    7,3
    ÇOLAK
    6,8
    ALBENTOSA
    6,6
    BORGES
    6,5
    ADRIÁN
    6,4
    LUCAS
    6,4
    LUISINHO
    6,4
    JUANFRAN
    6,3
    MOSQUERA
    6,1
    EQUIPO TÉCNICO
    5,5
    GUILHERME
    5,1
    FEDE VALVERDE
    5,1
    KROHN-DEHLI
    4,7
    EQUIPO ARBITRAL
    4,3
    BAKKALI
    4,3
    O periodo de votación finalizou o 20-04-2018 20:30.