Costa Rica, co deportivista Celso Borges nas súas filas, disputará a final de consolación da Concacaf Nations League ante Honduras, perdedor do encontro de semifinais ante Estados Unidos, mañá domingo 6 de xuño (16:30 hora local, 00:30 do luns 7 en España), no Mile High Stadium da cidade estadounidense de Denver.
O pasado xoves (madrugada do venres en España) Celso Borges e a súa selección disputaron a semifinal fronte a México. O mediocentro deportivista saíu ao campo no once inicial e foi relevado no minuto 82 por Bernald Alfaro. O partido finalizou con empate sen goles e decidiuse na quenda de penaltis, na que estiveron máis atinados os mexicanos (4-5).
Para pechar esta concentración, o combinado 'tico' xogará un amigable ante Estados Unidos o mércores 9 de xuño no Rio Tinto Stadium (Salt Lake City).
