RCD / NOVAS

Derrota branquiazul en Vallecas (3-1)

01/09/2019 20:05

O Deportivo caeu en Vallecas ante o Rayo nun partido no que se adiantou pronto, viu como o cadro local remontaba antes do descanso e, a pesar de ser mellor na segunda metade, non puido sacar nada positivo do feudo franxivermello.

O técnico deportivista, Juan Antonio Anquela, realizou catro cambios con respecto ao equipo que perdeu a pasada xornada en Huesca. Tres novidades estiveron na liña defensiva, na que David Simón, Mujaid e Diego Caballo entraron en lugar de Bóveda, o lesionado Somma e Luis Ruiz. Ademais, Borja Galán entrou a última hora por lesión de Longo no quecemento, ocupando a posición na que o xa ex deportivista Pedro xogou en El Alcoraz.

No primeiro minuto, unha cesión estivo a piques de sorprender a Alberto García. O pase atrás de Esteban Saveljich non atopou a portería rayista e o balón foise directamente a córner. O saque de esquina transformouse nunha rápida contra do Rayo que acabou perdéndose por liña de fondo pola precipitación do catro xogadores locais que se sumaron ao rápido ataque no que conseguiron superioridade numérica.

A ocasión local foi o prólogo da primeira acción decisiva do partido: unha falta sobre Álex cando conducía a 30 metros de portería. Colocáronse para o lanzamento Gaku e Aketxe, quedando a execución para o especialista vasco. O potente lanzamento botou xusto antes da posición de Alberto García para coarse directamente no marco e adiantar aos branquiazuis nun dos primeiros intercambios de golpes do partido. Foi o segundo tanto de Aketxe no que vai de temporada.

O Rayo dispuxo da súa primeira gran ocasión nun remate de Álvaro García só, desde o punto de penalti, após recibir directamente desde a esquina, e que se marchou desviado.

Caballo, no minuto 14, viu cartón amarelo por entrada a Embarba. O lateral vía constantes acometidas rayistas por esa banda. Precisamente por ese costado naceu unha rápida contra de Aketxe e Caballo, pero o pase do salmantino a Borja Galán, que se ía só, acabou cun remate contra o central que acabou en saque de esquina despois de que o madrileño perdese no control a vantaxe coa que arrincara.

No minuto 17, o Rayo materializou as súas acometidas dos minutos anteriores. Primeiro chegou un remate ao traveseiro e posterior manoplazo de Dani Giménez que evitou que o rexeite coásese na portería. Nese mesmo córner chegou o tanto do empate. O saque de esquina directo á frontal da área pequena atopouse coa cabezada, libre de marca, de Mario Suárez, que puxo as táboas no marcador.

Recentemente superada a media hora, xusto trala pausa de hidratación pactada pola calor reinante en Madrid, o Rayo Vallecano adiantouse no marcador por medio de Álvaro García, que co seu pé esquerdo fusilou a Dani Giménez despois de facerse no centro da área cun centro de Embarba desde o extremo esquerdo.

O partido equilibrouse entón. O Deportivo recuperou varios balóns con presión alta e nun deles estivo a piques de devolver a paridade ao marcador. Foi no minuto 40, á saída dun córner xerado após unha recuperación de Aketxe e chegada de Borja Valle polo extremo. Mujaid enganchou de chilena un balón que quedou solto na área. O seu espectacular remate foise rozando o traveseiro.

Coa vitoria do conxunto local chegouse ao descanso, tralo que o Deportivo adiantou aínda máis a súa presión.

No minuto 51, Aketxe gozou dunha gran oportunidade para o 2-2, pero o seu disparo de socato, a centro raso ao momento de penalti de Diego Caballo, atopouse co corpo de Saveljich co gardameta rayista batido. Cinco minutos despois, Alberto rexeitou unha cabezada de Koné a centro de David Simón, após unha boa acción de ataque pola dereita, entre o lateral canario e Borja Galán.

Sobre a hora de xogo, Anquela introduciu os dous primeiros cambios, cos que Koné pasou a xogar no extremo esquerdo en lugar de Borja Valle, substituído por Christian Santos.

Pouco despois, un fabrilista, Mujaid, deixou o seu sitio a outro, David Sánchez, que efectuou así o seu debut oficial co primeiro equipo branquiazul. Con esta permuta, Álex Bergantiños atrasou a súa posición para formar parella con Lampropoulos no centro da defensa.

Recentemente superado o minuto 90, o Rayo sentenciou o encontro por medio de Pozo, que coa súa bota dereita mandou ao fondo das mallas o rexeite do poste a unha cabezada de Piovaccari.

Xa a piques de finalizar o encontro, Aketxe estrelou na madeira un córner directo co que estivo a piques de sorprender ao porteiro local.

Con esta derrota, o conxunto branquiazul continúa con 3 puntos após 3 xornadas disputadas.

Rayo Vallecano: Alberto García, Advíncula, Catena, Saveljich, Akieme, Pozo, Mario Suárez (Martín Pascual, min. 85), Embarba, Trejo (Óscar Valentín, min. 58), Álvaro García e Andrés Martín (Piovaccari, min. 70).

RC Deportivo: Dani Giménez, David Simón, Lampropoulos, Mujaid (David Sánchez, min. 72), Diego Caballo, Álex Bergantiños, Gaku (Vicente Gómez, min. 64), Borja Galán, Aketxe, Borja Valle (Christian Santos, min. 65) e Koné.

Goles: 0-1 Aketxe (min. 6); 1-1 Mario Suárez (min. 18); 2-1 Álvaro García (min. 34); 3-1 Pozo (min. 90+1).

Árbitro: Trujillo Suárez (c. tinerfeño). Cartón amarelo a Diego Caballo (min. 14) e Mario Suárez (min. 73).

Incidencias: partido da 3ª xornada de LaLiga SmartBank disputado no Estadio de Vallecas ante 8.990 espectadores.

RCD / J3 LaLiga SmartBank

Suplentes

Suplentes

Estadio

Estadio de Vallecas

Goles

  • 0-1 (6'). Aketxe
  • 1-1 (18'). Mario Suárez
  • 2-1 (33'). Álvaro
  • 3-1 (90+1'). Pozo

Árbitro

..