RCD / NOVAS

O Dépor non atopa o camiño do triunfo (0-2)

20/10/2019 18:30

O Deportivo caeu ante o Málaga CF nun encontro que premiaba ao vencedor con saír das posicións de descenso. Os goles de Mikel Villanueva, ao fío do descanso, e Armando Sadiku, nos instantes finais, condenaron aos branquiazuis, que o tentaron por todos os medios na segunda parte pero non atoparon o camiño do gol co que polo menos empatar o tanto inicial dos malaguistas.

Luis César, na súa estrea en ABANCA-RIAZOR aos mandos do Dépor, realizou tres cambios con respecto ao once que presentou no seu primeiro partido como técnico branquiazul, hai 7 días no Estadio Gran Canaria. En defensa, Javi Montero entrou no sitio de Jorge Valín, co que Eneko Bóveda regresou ao lateral dereito. En mediocampo, Gaku Shibasaki substituíu a Vicente Gómez, mentres que na liña ofensiva, Víctor Mollejo ocupou a posición que ante a UD Las Palmas ocupara Borja Galán.

O Málaga gozou dun primeiro achegamento á portería de Dani Giménez no minuto 4, mediante unha das súas grandes bazas, os longos saques de banda de Luis Hernández. Nesta ocasión, o balón colgado polo central malaguista cabeceouno Adrián moi preto do pau esquerdo da portería branquiazul. No minuto 11, Sadiku dispuxo dun man a man ante Dani Giménez, aínda que moi escorado á dereita. O seu disparo detívoo con facilidade o gardameta deportivista.

Durante un longo tramo da primeira parte sucedéronse as imprecisións e erros por parte de ambos os bandos, que apenas pisaron as respectivas áreas rivais.

No minuto 32 volveu probalo o Málaga, nun novo saque de banda de Luis Hernández, que concluíu cun remate acrobático de Antoñín que deixou a pelota na parte superior da rede do portal coruñés.

De novo a balón parado levou perigo o conxunto visitante, e esta vez fíxoo para adiantarse no marcador, nun saque de esquina lanzado desde a dereita do ataque andaluz por Renato Santos, peiteado no primeiro pau por Antoñín e remachado no segundo por Mikel Villanueva. Corría o minuto 42.

Coa vitoria pola mínima do equipo malagueño chegouse ao descanso.

Á saída de vestiarios as cousas non melloraron no seo deportivista e estiveron a piques de empeorar, cousa que evitaron dúas mans milagrosas de Dani Giménez noutros tantos remates consecutivos de Cristo. O primeiro, após desbordar polo extremo esquerdo e plantarse ante o porteiro deportivista. O segundo, despois de capturar o despexe en curto da zaga coruñesa trala intervención do gardameta. Non transcorreran nin 50 segundos do comezo da segunda metade.

Unha vez superado o susto inicial, o Dépor fíxose co mando do partido. Monopolizou a posesión do balón e acaparou o dominio territorial, xogando constantemente na metade de campo do Málaga. Con todo, iso non resultou suficiente para xerar unha ocasión digna de mención.

Si é rescatable unha acción na que Renato Santos tocou o balón co brazo na área, recentemente superada a hora de xogo. O colexiado non castigou a acción con penalti, pero recibiu o aviso do VAR, tralo cal, sen achegarse a consultar na RRA (Área de Revisión do Árbitro), mandou seguir o xogo.

Pouco despois, o Málaga estivo a piques de ampliar distancias, sen sequera pisar a área coruñesa. Renato Santos enganchou unha volea desde 25 metros á que Dani Giménez respondeu cunha gran estirada, coa que desviou o coiro a saque de esquina.

Luis César fixo un dobre cambio para tratar de empuxar un pouco máis e encerrar ao equipo malaguista. Entraron Saša Jovanović e Christian Santos por Gaku e Mollejo, co que o Dépor pasou a xogar con debuxo 4-4-2.

O cambio non sentou ben ao Dépor, que viu como Sadiku tivo a opción de sentenciar o encontro en dúas ocasións consecutivas. No minuto 78, quedou só ante Dani Giménez, disparou cruzado e o balón foise lambendo o poste esquerdo da portería herculina. Acto seguido, de novo quedou man a man co porteiro deportivista, que quedou co esférico nas súas mans.

Con todo, un minuto despois o Deportivo dispuxo da súa mellor ocasión até entón. Un perfecto centro de Christian Santos desde a esquerda rematouno Longo co seu pé dereito, pero fíxoo á dereita da portería defendida por Munir Mohand.

Co Deportivo asumindo moitos riscos, o Málaga acabou sentenciando o encontro no minuto 87, cunha cabezada a porta baleira de Sadiku. O dianteiro albanés aproveitouse dun erro de cálculo de Dani Giménez cando saía a despexar un pelotazo da defensa visitante.

Con esta nova derrota, o Deportivo continúa con 8 puntos na cola de clasificación.

RC Deportivo: Dani Giménez, Bóveda, Peru Nolaskoain, Montero, Salva Ruiz, Álex Bergantiños, Gaku Shibasaki (Jovanović, min. 70), Mollejo (Christian Santos, min. 70), Aketxe, Borja Valle e Longo (Koné, min. 84).

Málaga CF: Munir, Cifuentes, Luis Hernández, Lombán, Mikel Villanueva (Diego González, min. 71), Keidi Bare, Antoñín (Hicham, min. 78), Renato Santos (Boulahroud, min. 85), Adrián, Cristo e Sadiku.

Goles: 0-1 Mikel Villanueva (min. 42); 0-2 Sadiku (min. 87).

Árbitro: De la Fuente Ramos (c. castelán-leonés). Cartón amarelo a Peru Nolaskoain (min. 40) e Keidi Bare (min. 85).

Incidencias: partido da 12ª xornada de LaLiga SmartBank disputado no Estadio ABANCA-RIAZOR ante 14.349 espectadores.

RCD / J12 LaLiga SmartBank

Suplentes

Suplentes

Estadio

Estadio ABANCA-RIAZOR

Goles

  • 0-1 (42'). Mikel
  • 0-2 (87'). Sadiku

Árbitro

..

RCD / Vídeo

RCD / Vídeo

RCD / Vídeo

Valora a #osnosos no #DéporMálaga

#ANOSAFORZA
6,9
DANI GIMÉNEZ
5,0
EQUIPO ARBITRAL
4,6
MOLLEJO
4,1
ÁLEX BERGANTIÑOS
3,9
BORJA VALLE
3,8
KONÉ
3,6
AGER AKETXE
3,5
CHRISTIAN SANTOS
3,3
GAKU SHIBASAKI
3,1
SALVA RUIZ
3,0
PERU
3,0
ENEKO BÓVEDA
2,9
LONGO
2,8
JOVANOVIĆ
2,7
EQUIPO TÉCNICO
2,7
JAVI MONTERO
2,4
O periodo de votación finalizou o 25-10-2019 12:00.