Historia dos xuvenís
O equipo Xuvenil do RC Deportivo nace en 1949, sendo presidente Daniel Chaver Gómez, e da man do adestrador do primeiro equipo, o arxentino Alejandro Scopelli. "O Coello", como era alcumado cando era xogador de Estudantes de La Plata e da selección arxentina coa que foi subcampión do Mundo en 1930, foi un técnico revolucionario en moitos aspectos, entre eles a creación de categorías inferiores. O principal problema co que se achou foi que aínda non existían competicións específicas para estes equipos. É por iso que na súa primeira temporada, os Xuvenís do RC Deportivo participaron na Serie A Rexional, medíndose a equipos adultos cando todos eles eran menores de 18 anos. O equipo era coñecido nun principio como "Escola Scopelli", aínda que naquel campionato foi inscrito como Deportivo B. Formaban aquel equipo Ernesto, Boedo, Modesto, Salorio, Barbeito, Fefé, Juan Núñez, Folla, Losada, Luis Suárez e Bouza, con Díaz como porteiro suplente.
Na Temporada 1995-1996 voltou a mudar o sistema de competición. Desaparecía a Superliga e a División de Honra, dividida en grupos, pasaba a ser a máxima categoría, dilucidándose o título nacional nun mini-torneo, a Copa de Campións, entre os gañadores de cada grupo. Non puido comezar mellor esa nova era, pois o RC Deportivo proclamábase campión do Grupo I após superar o Racing de Santander, que o avantaxaba nun punto antes da última xornada. O equipo dirixido por José María Blanco impúñase por 2-4 ao Oviedo mentres os cántabros perdían sorprendentemente en Xixón ante La Braña (1-0).
O RC Deportivo quedaba encadrado no Grupo 2 da Copa de Campións, que se celebraría en Puertollano (Cidade Real). O equipo branquiazul comezou empatando 1-1 co Sevilla, ao que se impuxo nunha quenda de penaltis que acabaría resultando decisiva. No segundo encontro, o Sevilla venceu o Athletic Club por 5-1, o que obrigaba aos herculinos a derrotaren os bilbaínos por catro goles de diferenza. O RC Deportivo conseguiuno mercé a un tanto de Coloma no último minuto.
Tras un novo terceiro posto e outra participación copeira, superando o Danok Bat en oitavos e caendo en cuartos ante o Valencia, na Temporada 2007-2008 chegou o segundo título de División de Honra. Na Copa de Campións, cruel eliminación no primeiro encontro, fronte ao Sevilla, na quenda de penaltis (4-5) tras o 2-2 co que concluíron os 120 minutos. Xogaron polo RC Deportivo, aquel 5 de maio de 2008 no Estadio Alberto Ruiz (Colmenar Viejo), Darío, Hugo Rodríguez (Vieytes, min. 97), Marcos Caridad, Agustín, Raúl, Juan Domínguez, Héctor (Luís Ángel, min. 65), Añón (Óscar, min. 107), Dani Bea (Benito, min. 58), Chirri e Hugo García. O adestrador era José Luis Devesa. Aquel equipo tamén disputou a Copa do Rei. A Real Sociedad eliminou os coruñeses nos oitavos de final: 3-0 en Zubieta e 3-3 en Abegondo.
No exercicio 2008-2009, novo subcampeonato e pasaporte copeiro. O RC Deportivo quedaba de novo nos cuartos de final, ante o Tenerife, despois de superar a Real Sociedad. E na campaña 2009-2010 conquistouse a terceira coroa de División de Honra. Na Copa de Campións tampouco houbo sorte, pois o Valencia, con Paco Alcácer e Isco nas súas filas, derrotou os branquiazuis na primeira eliminatoria (1-2). O partido disputouse o 3 de maio de 2010 no Estadio Foietes de Benidorm e o RC Deportivo formou con Edu, Martín (Insua, min. 46), Anxo, Uxío, José Manuel, Carlos, Vela, Adrián (Juan, min. 60), Iago Beceiro (Álex, min. 60), Juan Carlos e Richi (David, min. 76). Na Copa do Rei, unha vez máis o Athletic e unha vez máis os cuartos de final: 1-0 na ida en Abegondo e 2-0 na volta en Lezama. En oitavos, caera a mans deportivistas, novamente, a Real Sociedad.
En 2010, José Manuel Martínez Paz "Secho" sucede como míster deportivista a Devesa, tras sete temporadas deste ao mando dos Xuvenís. Na súa estrea o equipo alcanza unha terceira posición que o leva a disputar a Copa do Rei por sexta campaña consecutiva. Naquel curso 2010-11, o RC Deportivo Xuvenil asinaría a súa mellor actuación no torneo do KO, ao alcanzar as semifinais. En oitavos eliminou, por terceira vez consecutiva, á Real Sociedad (1-2 en Zubieta e 4-1 en Abegondo) e en cuartos logrou unha histórica vitoria sobre o Real Madrid (2-0 en Abegondo e 3-1 en Valdebebas). En semifinais, o Barcelona de Deulofeu e Rafinha foi demasiado rival: 1-4 en Abegondo e 3-3 no Miniestadi. O 18 de xuño de 2011, na Cidade Condal, defenderon a camisola branquiazul David Gómez (Rodrigo, min. 81), Uxío, Adrián, Fernando (Róber, min. 31), Insua, Álex Ares (Tomás, min. 62), Iago Beceiro, Queijeiro, Luis (Brais, min. 54), Lemos (Manu Valerón, min. 46) e Álex Pérez.
Os Xuvenís voltaron a disputar a Copa do Rei en 2013, caendo ante Osasuna en oitavos de final, en 2015, sendo eliminados na mesma rolda pola Real Sociedad, e en 2017, eliminando ao Osasuna en oitavos de final e caendo en cuartos ante o Sevilla. Na Temporada 2013-2014, un xogador do RC Deportivo campión de Liga de Primeira División en 2000, Jaime Sánchez, foi o adestrador do equipo Xuvenil, deixando paso a campaña seguinte a un excapitán do primeiro equipo branquiazul, José Ramón González Pérez.
Os Xuvenís branquiazuis non volveron impoñerse no Grupo 1 da División de Honra ata o curso 2020-21, no que ademais acabaron facendo historia ao conquistar a segunda Copa de Campións, xusto un cuarto de século despois da primeira. O equipo dirixido por Óscar Gilsanz superou a RC Celta e Real Sporting de Gijón e accedeu ao torneo polo título nacional, nun formato diferente ao habitual debido á pandemia de COVID-19. Os branquiazuis cruzáronse nuns cuartos de final a dobre partido coa UD Las Palmas, resoltos na quenda de penaltis na capital canaria (2-1 e 2-1, 1-3 por penaltis). As semifinais, nunha Final Four celebrada en Marbella, depararon un duelo co Real Madrid que decidiu un cabezazo do central Fito á saída dun córner (1-0). Na final esperaba o FC Barcelona, que nada puido facer ante os Xuvenís deportivistas, que se impuxeron con claridade (3-1), grazas a un dobrete de Noel e un tanto de Mario. O equipo deportivista que saltou ao céspede do Marbella Football Center o 27 de xuño de 2021 estivo formado por Brais Suárez, Trilli, Fito (Urdiales, min. 89), Dani Barcia, Guille Bueno, Brais Val, Mario (Raúl, min. 78), Víctor, Nájera (Jairo, min. 89), Mella (Nico Clouston, min. 89) e Noel (Yeremay, min. 83).
Esa vitoria permitiu ao Xuvenil A participar na UEFA Youth League por primeira vez na súa historia, na Temporada 2022-2023. O equipo branquiazul eliminou na primeira rolda da Ruta de Campións Nacionais ao campión polaco, o MKS Pogoń Szczecin, despois de remontar o 3-0 da ida cun 4-0 sobre a bucina en ABANCA-RIAZOR, onde se congregaron máis de 8.500 afeccionados. Na segunda eliminatoria, os branquiazuis varreron en ABANCA-RIAZOR, ante máis de 12.000 espectadores, ao Maccabi Haifa FC, campión de Israel (5-1) e aguantaron a súa vantaxe no partido de volta (3-0). Na rolda de playoff o rival foi un dos equipos procedentes da Ruta Champions League (na que participaron os 32 equipos cuxo conxunto sénior xogou a Liga de Campións aquela campaña), o FC Dynamo Kyiv, a partido único en ABANCA-RIAZOR. A pesar de quedar cun xogador menos á media hora por expulsión de Rubén López, os pupilos de Manuel Pablo igualaron o marcador (2-2), levados polo aire por nada menos que 20.115 deportivistas. Na quenda de penaltis, os ucraínos estiveron máis acertados (2-3) para poñer fin ao soño de #ANOSACANTEIRA.