O cadete deportivista José Rey non tivo minutos ante Estados Unidos coa selección española sub-16 no Estadio Olimpic Camilo Cano de La Nucía, con motivo da 1ª xornada do Torneo Internacional Football Federations Cup. Esta competición amigable celébrase até o domingo 27.
Comparten cartel cos españois e os estadounidenses, Xapón, Gales, Bélxica, Inglaterra, México e Alemaña.
Após chegar ao tempo regulamentario con igualada (2-2), os españois estiveron máis atinados desde o punto de penalti: 4-2.
O vindeiro venres 25, España medirase a Xapón ou Gales.
José Rey pertence ao cadro do Cadete que lidera a División de Honra con 5 puntos de vantaxe sobre o 2º clasificado, o RC Celta. Esta temporada, suma 4 goles.
A consecuencia desta citación internacional, o atacante será baixa esta fin de semana no encontro ligueiro do seu equipo ante o ED Xuventude de Oroso.
Desta forma, #ANOSACANTEIRA volve estar no punto de mira das categorías inferiores da selección española porque recentemente o dianteiro do Xuvenil A Kevin Sánchez participou coa sub-18 en dous partidos amigables ante Suíza na Ciudad del Fútbol de Las Rozas.
