O Fabril logrou a súa segunda vitoria da temporada, tamén a segunda consecutiva após vencer a pasada semana á Arandina CF en Abegondo, e a primeira fóra de casa.
O filial branquiazul derrotou con claridade ao CD Covadonga en Oviedo, no seu terceiro partido lonxe de Abegondo e tamén terceiro en Asturias, onde se mantén invicto: empates ante Real Avilés Industrial e Club Marino de Luanco e vitoria ante o CD Covadonga.
A velocidade, intensidade e calidade dos fabrilistas superou con fartura ao conxunto ovetense, que nunca tivo opcións de quedar algo positivo.
O Fabril adiantouse no marcador recentemente superado o cuarto de hora de xogo. Kevin, un atacante de categoría xuvenil asentado no filial, bateu ao porteiro local Buru nun man a man nunha acción que naceu nos pés de Diego Gómez.
Os mesmos xogadores foron os protagonistas do segundo tanto, á media hora de xogo. Nun roubo fabrilista na presión, Kevin regatea ao porteiro e quédalle o balón ao ourensán, a porta baleira.
Co partido controlado polos pupilos de Óscar Gilsanz, Rubén anota o terceiro no minuto 75 de novo con Diego Gómez como asistente e ante un rival xa cos brazos caídos.
Após este triunfo, o Fabril afiánzase na zona media-alta da clasificación, con 8 puntos após 5 partidos, nos que anotou 10 tantos, unha media de 2 por encontro, só superada no que vai de curso polos 14 goles marcados polo Pontevedra CF.
CD Covadonga: Buru, Nino, Álvaro (Asier, min. 46), Trabanco, Figar (Berto, min. 55), Pablo Tineo (Avanzini, min. 76), Arce (Santullano, min. 59), Omar, Samu, Endika (Morilla, min. 46) e Ariel Herrero.
Fabril: Brais Suárez, Lache, Puerto, Marotías, Iano Simão, Brais Val, Rubén López (Santamaría, min. 82), Iñaki (Barba, min. 72), Vilán (Thymos, min. 66), Diego Gómez (Somolinos, min. 82) e Kevin (Mati Castillo, min. 66).
Goles: 0-1 Kevin (min. 18); 0-2 Diego Gómez (min. 31); 0-3 Rubén López (min. 75).
Árbitro: Ibon Asier Urízar Díaz (c. vasco). Cartón amarelo a Kevin (min. 21), Buru (min. 21), Nino (min. 45), Ariel Herrero (min. 45+1), Arce (min. 56), Berto (min. 80), Santullano (min. 86) e Morilla (min. 86).
Incidencias: partido da 5ª xornada do Grupo 1º de Segunda Federación disputado no campo Juan Antonio Álvarez Rabanal (Oviedo).
