O dianteiro do Fabril Pedro Alves Correia, que o ano pasado realizou a pretemporada co Deportivo, atópase este mes na cidade de Vaasa (Finlandia), concentrado coa selección portuguesa no Campionato de Europa sub-19.
Nesta competición participan as 8 mellores seleccións europeas, con moitas das grandes promesas do fútbol continental.
Portugal quedou encadrado na Primeira Fase no grupo A, con Finlandia, Noruega e Italia.
Hoxe domingo 22 de xullo, a selección lusa impúxose con toda xustiza (3-0) á anfitrioa Finlandia no Hietalahti Stadium de Vaasa.
O dianteiro fabrilista, do mesmo xeito que sucedeu nos outros dous partidos do seu equipo (ante Noruega e Italia), estivo no banco e non chegou a saltar ao terreo de xogo.
Con este resultado, Portugal xogará as semifinais o xoves 26 e, de paso, logrou o seu billete para o próximo Campionato do Mundo sub-20.
O calendario da selección lusa (en horario local), cos resultados dos partidos xa xogados, é o seguinte:
Luns 16 de xullo
NORUEGA 1 - PORTUGAL 3
Xoves 19 de xullo
PORTUGAL 2 - ITALIA 3
Domingo 22 de xullo
PORTUGAL 3 - FINLANDIA 0
Xoves 26 de xullo
Semifinal
PORTUGAL - RIVAL POR DETERMINAR
