Fin de semana atípica para o Fabril, que non tivo partido ao ser suspendido polo temporal o encontro deste mediodía no Estadio Vero Boquete de Santiago ante a SD Compostela, correspondente á 20ª xornada no grupo 1º de Federación.
Pendentes deste encontro, o filial queda provisionalmente con 27 puntos na 9ª posición da táboa.
Non está a ter fortuna o conxunto de Manuel Pablo coa meteoroloxía posto que o pasado mes de novembro outro temporal provocou a suspensión do partido nas Eiroas ante o Bergantiños CF.
Sen cita ligueira, Manuel Pablo deu descanso aos seus futbolistas hoxe domingo. Iso si, Pablo García e Alberto, ademais de Kevin Sánchez, que onte tivo minutos de xogo en ABANCA-RIAZOR co primeiro equipo, adestráronse co Dépor esta mesma mañá en Abegondo.
O Fabril retoma a competición a próxima fin de semana en casa ante un dos favoritos ao ascenso a Primera Federación, o Pontevedra CF.
