Os Nosos completaron esta mañá unha nova sesión de adestramento en Abegondo antes de iniciar a semana de preparación da próxima cita no grupo 1º de Primeira Federación, o vindeiro domingo 16 de abril ás 19:00 horas na Malata ante o Racing de Ferrol (TVG-2 e InSports.tv).
Nada máis sumar un novo triunfo onte en ABANCA-RIAZOR ante o CF Fuenlabrada, e mentres os xogadores no centro do campo saudábanse e agradecían a #ANOSAFORZA o seu incondicional empuxe desde a bancada, o corpo técnico formou unha piña na banda ao redor de Óscar Cano: "Ímolo conseguir!", exclamaba o adestrador andaluz entre o 'himno' oficial que soaba como é habitual pola megafonía do estadio e o aplauso ao equipo do deportivismo. Pouco despois facía esta reflexión ante os medios de comunicación: "Dáme alegría que haxa 7 ou 8 membros do staff que che buscan".
O técnico deportivista apuntaba que despois de pasar a noite coa súa familia chegada desde a afastada Granada, "a partir de mañá (por hoxe) a valorar como é o Racing, que lle podemos facer, que nos poden facer e seguir remando, seguir remando porque isto é fútbol".
Os futbolistas estaban citados hoxe ás 09:00 para almorzar xa na instalación branquiazul antes de saltar ao céspede, a partir das 10:30 horas.
A xornada foi de recuperación para os titulares onte, con carreira continua, estiramentos, ximnasio e fisioterapia.
Os demais tiveron traballo intenso supervisado principalmente polos preparadores físicos Luis Fandiño e Sergio Roca: quecemento con roda de pases, rondos, finalizacións e fútbol reducido para concluír.
Pepe Sánchez é o único futbolista con adestramento personalizado ás ordes de Alejandro Canosa, readaptador do primeiro cadro.
Óscar Cano vaticina na Malata "unha volta de chave, mirando cousas que se fixeron ben tamén, porque non merecemos perder ningún dos que se perderon fóra de casa dos últimos".
Subliña que "se fixeron ben cousas e moitas: utilizamos tres centrocampistas Rubén e Isi e un máis defensivo; utilizamos dous de corte máis defensivo máis un; utilizamos o 4-4-2 con Max e con Lucas en San Sebastián de los Reyes; xogamos cun extremo que entra cara a dentro como é Mario ou noutras con Kike Saverio... Probamos moitísimas cousas e quizais haxa que probar outras. Para iso temos os recursos que temos".
Por conseguinte, haberá en Ferrol "senón grandes cambios pequenos cambios que condicionen para ben ao equipo".
Pero antes haberá un respiro para o cadro mañá luns e o martes. Os Nosos están citados de novo en Abegondo o mércores 12 ás 09:00 para saltar ao céspede a partir das 10:30 horas.
