Pre-reserva de entradas para os socios do Dépor para #ONosoDerbi

O RC Deportivo porá a disposición dos seus afeccionados un total de 700 entradas a un prezo unitario de 30 euros, sendo a distribución: 420 para abonados mediante o sistema de pre-reserva de entradas e 280 a disposición das penas deportivistas (correspondentes á porcentaxe fixada por convenio) e xestionadas directamente pola Federación de Penas do Deportivo.

 

Como en anteriores partidos de alta demanda, ponse en funcionamento o sistema de pre-reserva de entradas seguindo estes criterios:

 

O venres 7 de outubro ás 16:00 h. activarase a plataforma entradas.canaldeportivo.com, que estará operativa ata o martes día 11 ás 23:59 h.

 

Só poderán pre-reservar entradas os socios do Real Club Deportivo. O sistema permitirá facer a pre-reserva de 1 ou 2 localidades para o partido. O socio deberá introducir o seu nome, apelidos, número de Abonado e IDE de socio. Ao facer click en Pre-reservar "" recibirá un correo que deberá validar obrigatoriamente para completar o proceso (advertencia: nalgúns casos este correo chega á caixa de correos de spam do socio, polo que se recomenda comprobar a recepción, xa que a validación é obrigatoria para completar a pre-reserva). 

 

Lémbrase aos abonados do RC Deportivo que as entradas son nominativas, por tanto o socio que introduza o seu IDE de socio, nome e apelido e sexa seleccionado na pre-reserva, xa sexa seleccionando 1 entrada ou se selecciona 2, terá que facer uso directo da súa entrada, non podendo cedela a un terceiro.

 

A todos aqueles socios que non teñan acceso a internet ofréceselles a posibilidade de facer persoalmente a pre-reserva na propia Oficina de Atención ao Socio e Accionista do Estadio de Riazor. Os empregados do Real Club Deportivo serán os encargados de introducir os seus datos no sistema para que este xere o número de pre-reserva correspondente. Esta opción estará dispoñible o luns 10 e martes 11 de 10:00 a 13:30 e de 16:30 a 19:00 horas.

 

Unha vez pechado o prazo para este proceso, se o número de pre-reservas realizadas polos socios do Deportivo é inferior ao número de entradas dispoñibles, a adxudicación e reserva de entradas será directa e as entradas sobrantes poranse á venda para socios directamente en portelo a partir do luns día 17 (neste caso tamén é imprescindible a presentación do DNI dos destinatarios finais das entradas, podendo retirar un máximo de dúas entradas por socio e podendo presentar cada socio un único carné en portelo).

 

No caso de que o número de pre-reservas sexa superior a 420, todas as pre-reservas validadas entrarán nun sorteo que o propio sistema realizará de forma automática. Se se dá esta situación, o mércores 12 de outubro farase público a listaxe dos adxudicatarios finais das entradas. Os adxudicatarios das entradas poderán retiralas os días 13 de 16:30-19:00, 14 de 10:00-13:30 e de 16:30-19:00 e o sábado 15 de 10:30 a 13:30 horas na Oficina de Atención ao Deportivista, sendo imprescindible mostrar o DNI físico ou fotocopia dos destinatarios finais das entradas.

 

Pechado o prazo de retirada, as entradas sobrantes daqueles adxudicatarios que non as retirasen poranse a disposición de todos os socios o luns día 17 en venda libre e directa (neste caso tamén é imprescindible a presentación do DNI dos destinatarios finais das entradas, podendo retirar un máximo de dúas entradas por socio e podendo presentar cada socio un único carné en portelo).