Zas continuará un ano máis, do 25 ao 29 de xuño, acollendo un dos DéporCampus Cabreiroá
Zas volverá organizar un dos DéporCampus Cabreiroá, o primeiro do verán de 2018 xunto a Ordes e Ourense, grazas á colaboración entre o RC Deportivo, as Escolas de Fútbol Luis Calvo Sanz e o consistorio zaense.
Á presentación do DéporCampus Cabreiroá 2018 de Zas acudiron Manuel Muíño Espasandín (alcalde de Zas), Óscar Lema Romero (concelleiro de Deportes) e Manolo Corredoira (coordinador do DéporCampus Cabreiroá 2018 de Zas). En representación do RC Deportivo participou Pablo Barros, director dos DéporCampus.
O concello da Terra de Soneira repite experiencia nos DéporCampus Cabreiroá despois da súa estrea en 2017 cunha quenda, do 25 ao 29 de xuño. O Campo de Fútbol Platas Reinoso, moi preto da localidade de Baio, será a sede deste DéporCampus Cabreiroá, cuxas inscricións están abertas a nenas e nenos de entre 6 e 14 anos e poderán realizarse até o mediodía do xoves 21 de xuño.
Os DéporCampus Cabreiroá creceron de forma exponencial desde a chegada do actual consello de administración do RC Deportivo. Dun campus cunha única sede e menos dun centenar de nenos e nenas en 2013 pasáronse ás actuais 14 localizacións. Este verán estréanse 5 sedes: Ourense, Cuntis, Dumbría, Boiro e Camargo (Cantabria), que se suman ás xa existentes en Abegondo, Viveiro, Bertamiráns, Caranza, Monforte, As Pontes, Ordes, Zas e Xenebra (Suíza).