Un total de 107 nenos e nenas que participaron esta semana na sexta quenda do DéporCampus en Abegondo tiveron hoxe o seu fin de festa.
Ao finalizar o adestramento do primeiro equipo, varios futbolistas (Álex Bergantiños, Mosquera, Ortolá, David Simón, Dani Giménez, Pablo Marí...) pasáronse polo campo principal da Cidade Deportiva, saudaron a todos os nenos e nenas, e asinaron autógrafos en camisetas, gorras...
Nesta ocasión, Borja Vale foi o encargado de entregar os diplomas a cada neno ou nena; e fotografouse con todos eles, nun acto que supuxo o fin de festa para esta actividade no verán de 2018. O dianteiro berciano foi despedido cunha gran ovación pola bancada, hoxe con bo número de familiares presentes.
Do mesmo xeito que ocorreu nas quendas anteriores, a mañá estivo dedicada a actividades deportivas e de competición, con inchables no campo de herba sintética.
Os DéporCampus Cabreiroá creceron de forma exponencial. Dun campus cunha única sede e menos dun centenar de nenos e nenas en 2013 pasáronse ás actuais 15 localizacións.
Este verán estreáronse 6 sedes: Ourense, Cuntis, Dumbría, Boiro, Revilla de Camargo (Cantabria) e Plasencia (Cáceres), que se sumaron ás xa existentes en Abegondo, Viveiro, Bertamiráns, Caranza, Monforte, As Pontes, Ordes, Zas e Xenebra (Suíza).
A participación roldou este ano os 1.500 nenos e nenas, no que constitúe todo un éxito de organización.
