- Muñoz (c), entre Domínguez e Aurre, na formación inicial do Dépor que gañou o Teresa Herrera de 1964 -
Luis Muñoz Grau (Sabadell, Barcelona, 10 de novembro de 1935), futbolista branquiazul na Temporada 1964-1965, faleceu hoxe aos 86 anos de idade.
Muñoz chegou ao Deportivo no verán de 1964, trala histórica campaña do ascenso a Primeira da man de Roque Olsen, na que os branquiazuis anotaron nada menos que 74 goles en 30 xornadas. Aquela 1964-65 foi a temporada do desembarco no primeiro equipo de Manolete e Pellicer e a do regreso á Coruña de Carlos Torres.
O centrocampista catalán disputou 18 encontros de Liga, todos como titular, e non participou en ningún dos catro encontros de Copa ante Granada CF e Real Sporting de Gijón. A súa achega non serviu para evitar o descenso a Segunda dun Dépor que acabou na última posición con soamente 15 puntos e 18 goles marcados en 30 partidos.
En pretemporada, Muñoz formou parte do equipo que conquistou o XIX Trofeo Teresa Herrera, o terceiro no palmarés do Deportivo. O sabadellense xogou a segunda metade da semifinal fronte ao FC Porto (2-0) e os 90 minutos da final ante o Sporting Clube de Portugal (4-0). Na final, o Deportivo formou co equipo da fotografía baixo estas liñas. De pe, de esquerda a dereita: Benegas, Carlos, Manolete, Domínguez, Muñoz e Aurre. Agachados: Loureda, Jaime Blanco, Veloso, Lamelo e Duarte.
Muñoz militou a maior parte da súa carreira entre CE Sabadell e RCD Espanyol, con 7 temporadas en cada club, totalizando nada menos que 240 encontros en Primeira División: 122 cos barceloneses, 100 cos vallesanos e 18 co RC Deportivo.
O RC Deportivo quere mostrar o seu máis sentido e sincero pésame á familia, amigos e ex compañeiros de Muñoz. DEP.
