Os xogadores titulares o pasado luns en Riazor ante a Real Sociedad rebaixaron esta mañá a intensidade do adestramento, no regreso do primeiro equipo ao traballo tras o descanso de onte.
Así, Juanfran, Andone, Navarro, Albentosa, Sidnei, Guilherme, Celso Borges, Carles Gil, Çolak realizaron sobre o céspede só a primeira parte da sesión. Babel nin sequera chegou a saltar aos campos de Abegondo, e realizou un traballo específico no ximnasio da cidade deportiva.
Para o resto do equipo, o adestramento foi de alta intensidade, cun traballo de posesión, un exercicio de finalizacións e partidos en espazo reducido, para concluír.
Laure e Bruno Gama continuaron co seu plan de readaptación deportiva, ás ordes de Fran Molano.
Mañá xoves, os futbolistas están citados en Abegondo ás 10.30 horas, nunha nova sesión preparatoria do choque deste sábado 10 de decembro ás 20.45 no Santiago Bernabéu (20.45, Bein Sports).
