As xogadoras internacionais do Deportivo ABANCA Silvia Mérida, Gaby García e Kika Moreno visitaron esta semana a biblioteca do Fogar de Santa Margarita. O centro, no que se atopa a residencia oficial de #anosacanteira e estudan algúns dos xogadores das categorías inferiores do Dépor, abriu as portas ás xogadoras branquiazuis tras a experiencia do ano pasado.
As deportivistas compartiron o seu tempo con nenos e nenas de primaria para tratar temas como a igualdade, o deporte feminino, a súa experiencia no Dépor e a súa participación en diferentes Campionatos do Mundo.
A defensa andaluza, que cursa 1º de bacharelato no centro e que xogou con España o Mundial Sub-17 de 2014, en Costa Rica, charlou con estudantes de 3º A, 3º B e 5º B. No caso das dúas futbolistas venezolanas, que disputaron o Mundial Sub-20 de 2016, en Papua Nova Guinea, co seu combinado nacional, o encontro produciuse con alumnos de 1º A de Primaria.
