O Deportivo retoma a liga no 2023 mañá domingo 8 de xaneiro en ABANCA-RIAZOR (19:00 horas, InSports.tv e TVG-2) ante o Unionistas de Salamanca CF, en partido correspondente á 18ª xornada, penúltima da primeira volta.
O Dépor encarará ese partido na 4ª posición do grupo 1º de Primera Federación con 32 puntos, só superado polo Real Madrid Castilla (3º con 35 puntos) e AD Alcorcón e Córdoba CF (ambos os igualados no liderado con 36 puntos).
Óscar Cano poderá contar con todo o seu cadro fóra de Antoñito, lesionado no seu aductor esquerdo e que está estes días con traballo personalizado; e de Víctor Narro, sancionado ao ser expulsado en Ceuta no último partido de 2022.
O Dépor viviu unha entrada frenética de 2023 coa incorporación de Lucas Pérez, apto para competir, nunha fichaxe que deu a volta ao mundo polo xiro sen precedentes que deu o futbolista coruñés á súa carreira, baixando dúas categorías (de Primeira División a Primera Federación) e coa súa multitudinaria presentación de máis de 7.000 persoas en ABANCA-RIAZOR.
Esta mañá, Os Nosos fixeron un último ensaio en ABANCA-RIAZOR, cun quecemento, finalizacións, un partido e un repaso ás accións de estratexia. O xuvenil Carlos foi o representante de #ANOSACANTEIRA na sesión.
Pola súa banda, Unionistas de Salamanca CF, no que milita o ex fabrilista Mario Losada e cedido polo Dépor o gardameta Alberto, marcha en 13ª posición con 19 puntos. Ten un partido menos posto que a súa visita á Balompédica Linense do pasado 11 de decembro suspendeuse no minuto 19 de partido, con 0-0, debido ao mal estado do terreo de xogo.
O conxunto salmantino, que saldou cun empate (0-0) e cunha vitoria (0-1) as súas dúas visitas á Coruña nas dúas temporadas anteriores en Primera Federación, acabou o ano 2022 con derrota no seu estadio ante o RC Celta B (0-3).
Iso si, Unionistas sabe competir contra os equipos da zona alta da táboa. Gañou na Malata (0-1) ou no seu estadio ao AD Alcorcón (2-1).
Óscar Cano, adestrador deportivista, advirte que "é un equipo que fai moi ben as cousas e que as fai moi ben contra os equipos da parte alta da clasificación".
Lembra precisamente o partido en Ferrol, "onde eu acudín en varias ocasións este ano e vin que é case imposible gañarlle ao Racing alí por todo o aluvión de xogo por fóra, cos seus extremos. Foi capaz de gañar alí e sen encaixar ningún gol".
Lonxe de Salamanca, e a falta de decidir o partido ante a Balompédica Linense, os branquinegros caeron en Córdoba (4-1), ante o Real Madrid Castilla (1-0) e León (2-0); empataron en Mérida, Alxeciras e San Sebastián de los Reyes por 1-1; e dobregaron ao Racing en Ferrol (0-1).
En rolda de prensa o seu técnico, Raúl Casañ, é consciente do "difícil partido que temos contra un rival como o Dépor en ABANCA-RIAZOR, con toda a afección que ten, co boom da fichaxe de Lucas. Nós ao noso, a traballar, a facer as nosas cousas, recuperar á xente ben".
Pide aos seus futbolistas na Coruña "non cometer erros, defender ben e á hora de atacar, que cheguemos e consigamos meter goles".
Finalizado o choque en ABANCA-RIAZOR, o Dépor terá o luns xornada de descanso.
