Un Deportivo ABANCA coa lección aprendida trala derrota da pasada fin de semana no campo do RCD Espanyol, encara un novo encontro lonxe de Abegondo, a visita ao CD Pradejón de mañá sábado 15 de xaneiro ás 16:30 horas no Campo Municipal de Pradejón, en choque correspondente á 14ª xornada no grupo norte de Reto Iberdrola.
Un Miguel Llorente que asegura estar "con máis confianza aínda que a semana pasada", manifestou en rolda de prensa que "as derrotas che dan pistas por onde tes que ir e que é o que funciona e o que non".
Alba Merino e Laura Fernández, esta debido a unha lesión muscular no semitendinoso da súa perna dereita, son as únicas ausencias dunha convocatoria na que repite a canteirá Aroa Guerra e á que regresa a capitá Cris Martínez.
As deportivistas cederon o pasado sábado en Barcelona o liderado do grupo, que volve estar en posesión do FC Levante Las Planas: 33 puntos as catalás por 31 as coruñesas.
Pola súa banda, as rioxanas marchan novenas na táboa con 17 puntos. No seu campo, esta temporada, gañaron ao Oviedo Moderno CF (4-2) e Atlético de Madrid B (3-0); empataron co CDE Racing Féminas (0-0); e perderon ante o DUX Logroño (0-3), CDF Osasuna (1-2), AEM Lleida (0-2). Ademais, o CD Pradejón pode presumir de ser un dos dous equipos, o outro precisamente é o Deportivo ABANCA, que foi capaz de dobregar esta temporada ao FC Levante Las Planas, e ademais no seu propio campo: 1-2 (9ª xornada).
Despois dun último adestramento esta mañá en Abegondo, as deportivistas desprázanse xa a Calahorra, con esta folla de ruta:
Venres 14 de xaneiro
12:30: Saída en autocar desde a Cidade Deportiva, con parada a comer en Vega de Valcarce
21:00 (hora aproximada): Chegada ao Hotel Zenit Calahorra
Sábado 15 de xaneiro
16:30: CD Pradejón - Deportivo ABANCA, no Municipal de Pradejón
Ao concluír, regreso en autocar á Coruña
O cadro deportivista está citado para adestrar de novo en Abegondo o martes 18 de xaneiro ás 17:00 horas.
