RCD / NOVAS

Víctor cre que o Eibar ''mantén unha traxectoria parecida á nosa''

  Víctor Sánchez do Amo manifestó esta mañana en rolda de prensa en Abegondo que o Eibar, rival do Dépor mañana sábado 19 de decembro en Riazor (22.05, TVE), "está facendo unha tempada fantástica. É unha línea parecida á nosa. Somos dous equipos que vimos de sufrir a tempada pasada, de pasar moitos apuros para manter a categoría. Empezamos forte, non quixemos deixar os deberes para o final da liga como pasó a tempada anterior, e mantemos unha traxectoria parecida".

18/12/2015 21:06

Subliña que "ten moito mérito a tempada que está a facer o Eibar. Vino moitísimos partidos porque ademais estame gustando moito como está a xogar, moi valente".

Da Copa e o emparellamento co CD Mirandés, o técnico deportivista opina que "che toque o rival que che toque, todos os equipos teñen moitísima ilusión nunha competición tan bonita como a Copa do Rei. Co cal, hai que tomar co máximo respecto a todos os rivais independentemente da categoría na que estea e da súa clasificación na liga".
 
 
Pola súa banda, Fayçal Fajr recoñeceu en rolda de prensa que o Eibar "está a facer unha boa tempada. Sabemos que vai ser un partido difícil, pero estamos preparados para xogar este partido".
 
Sobre o emparellamento copeiro co Mirandés, di o internacional deportivista que "é un equipo de Segunda División pero é un bo equipo. A Copa do Rei é moi diferente da liga e todos os rivais son moi difíciles. Agora pensamos máis no partido ante o Eibar pero sabemos que o Mirandés é un bo equipo".
 
Respecto do seu futuro, Fayçal deixa claro que "quero xogar aquí moitos anos. A ver se falan (os clubs) e arránxanse as cousas".

Máis novas de: VÍCTOR SDA, FAYÇAL