Máis de 120 participantes das sedes da Escola RC Deportivo en Outes, Cee, Alvedro, Colegio Internacional Eirís e Colegio Jesuitinas puideron gozar dunha xornada de convivencia na Cidade Deportiva de Abegondo, celebrada o pasado domingo 22 de maio.
A xornada comezou ás 10:00, no campo 4, con diferentes xogos, todo eles relacionados co fútbol, para que os adestradores do RC Deportivo puidesen coñecer de primeira man aos alumnos e alumnas das diferentes sedes.
Desde as 10:30 até as 12:00 realizáronse diferentes partidos de maneira simultánea. Nunha parte do campo a metade dos participantes xogaron unha competición de fútbol 5 e na outra metade unha competición de fútbol 7, cambiando de zona a zona durante o transcurso da mañá.
Unha vez finalizada a competición, os nenos e nenas recibiron a sorpresa dos xogadores do Dépor e varios integrantes do Dépor Genuine, que entregaron a cada un deles o diploma acreditativo da súa participación na actividade.
Para finalizar a xornada, no campo de herba sintética realizáronse diferentes sorteos de agasallos entre os grupos para posteriormente despedirse das familias que acudiron ao evento.
A Escola RC Deportivo continuará os seus adestramentos en todas as súas sedes até o próximo día 31 de maio. A preinscrición e reserva de praza do próximo curso para os participantes que acudiron esta temporada abrirase a finais de agosto e as inscricións ao público en xeral durante o mes de setembro.
O novo curso da Escola RC Deportivo comezará en outubro. Calquera club ou centro educativo que desexe sumarse ao proxecto pode solicitar información da actividade a través do correo electrónico escola@rcdeportivo.es.
Toda a información tamén pode consultarse na páxina web escola.rcdeportivo.es/gl.
