A Federación Española de Fútbol acordou trasladar ao domingo 4 de abril a celebración do partido entre o Ural CF e o Xuvenil A previsto para este domingo 7 de marzo e correspondente á 18ª xornada (última) no subgrupo A da División de Honra.
Os responsables federativos queren que antes desa última xornada, que será con horario unificado ás 12:00, o equipo de Óscar Gilsanz dispute os seus dous partidos aprazados por COVID-19: ante o RC Celta en Abegondo (xornada 14ª) e en Redondela fronte ao CD Choco (xornada 15ª). Ambos están de momento sen día de celebración.
Os técnicos branquiazuis non queren que o equipo perda ritmo competitivo e para iso, o Xuvenil A disputará un partido amigable o sábado 6 de marzo ás 16:30 en Abegondo ante o Atlético Arteixo de Preferente Autonómica.
A día de hoxe, o Xuvenil A é segundo na táboa con 36 puntos por 37 o RC Celta, equipo que tamén conta con dous partidos suspendidos pendentes de data.
