Borja Jiménez márchase de ABANCA-RIAZOR cunha sensación "agridoce porque fixemos un bo partido. Fixemos méritos ante un gran rival. Non se nos ten que esquecer que é un equipo de Primeira División, moi agresivo en todo o que fai a nivel defensivo, obrígache a facer moitas cousas ben para poder dominalos. Fixemos unha primeira parte moi boa con balón. Encaixamos un gol nunha acción un pouco parva porque xa estaba a primeira parte acabada".
O técnico deportivista apunta que "aos rapaces só podémoslles felicitar porque fixeron un esforzo moi grande, porque estiveron a moi bo nivel. Agora a pensar na liga con rabia porque vivimos un ABANCA-RIAZOR das grandes citas. (#ANOSAFORZA) Apertou moitísimo. Houbo momentos de sentir que tremía todo".
Destaca ademais o feito de "xogadores que non estaban a participar estiveron a un nivel moi bo, que nos reforza. A mirar á fronte. Os días que haxa que perder, que sexan así".
Opina que o gol de Doncel "é un golazo. Desde onde estou eu parecíame moi difícil para metela directa pero tiña moita confianza, golpeouna estupendamente. Alégrome por el".
Ademais lembra que respecto ao partido do outro día "repetiron Trilli, Borja Granero, Mario, Noel e Ian. E os que non están a participar pois Trigueros estivo a bo nivel; Aguirre volveu a demostrar o lateral que temos; Borja Granero xa xogou o outro día a bo nivel. Hoxe tiveron que defender moitos centros laterais. Trilli tivo os cinco primeiros minutos malos, pero logo estivo a un nivel de Primeira División. Fai cousas moi boas e de maneira continuada. Josep (Calavera) e Rafa (De Vicente) tiveron a capacidade de soster ao equipo, de permitirnos que atacásemos xuntos, de levar a pelota dun lado a outro. Non sorprendido porque os vexo no día a día, pero si moi satisfeito do partido que fixeron os dous. A Doncel o gol vaille a axudar moitísimo. Mario xa vén tendo esa continuidade, estivo ben; e Noel volveu a facer un moi bo partido porque é moi bo futbolista e hoxe pegouse con dous centrais de verdade".
Cre que a clave da eliminatoria puido estar no empate de Osasuna nos últimos segundos da primeira metade: "O que non se ten que producir é o córner. É un pouco a clave porque con 1-0 ao descanso, pois a segunda parte é doutra maneira, eles xa empezan a ter a obrigación, houbese máis espazos, tiñamos xogadores moi veloces no campo e no banco... Temos que aprender que a falta de 50 segundos non podemos conceder un córner. Ante este tipo de rivais, de Primeira División, calquera mínimo detalle cústache un gol".
Así mesmo, no segundo gol osasunista, "tivemos un mal balance. Incorporamos demasiada xente. Todo o de despois non o sei. Sei que protestan o rexeite de Ian, pero non podo achacar iso ao gol. Teño que ir máis para atrás e ver que non fixemos un bo balance. Incorporamos a demasiada xente co equipo aberto e a perda veunos de volta", reitera.
Pola súa banda, Jagoba Arrasate, técnico do Osasuna, mostrouse "contento. Obxectivo cumprido. Onte xa previamos un partido difícil e igualado. E así foi. Enfrontámonos a un grandísimo Dépor e custounos moito. Ese gol nas postrimerías do primeiro tempo deunos algo de calma e no segundo tempo estivemos algo mellor. Non tivemos o partido controlado en ningún momento porque o Dépor fixo un gran partido".
Así pois, o adestrador vasco queda "máis co pase, con cousas positivas, que a xente acumulou minutos, que os dous dianteiros que iniciaron fixeron gol; pero custounos moitísimo", insiste.
