Onte venres en rolda de prensa, Óscar Gilsanz, técnico do Fabril, aseguraba que "o proceso que está a ter este equipo este ano é brutal para o crecemento dos xogadores". Pois ben, esta tarde no Vao ante o Coruxo (1-2) houbo outra clase maxistral de resiliencia dos fabrilistas.
O partido chegaba ao minuto 90 con 1-0 a favor dos vigueses grazas a un golazo de Mario no minuto 29. Con todo, nos 5 minutos de desconto o Fabril foi capaz de darlle a volta ao marcador con goles de Álex Alfaro e Mati Castillo nun acto de fe e corazón branquiazul.
Con este resultado, o conxunto de Óscar Gilsanz suma 40 puntos situado na 9ª posición, a falta do resto de partidos da xornada.
O filial presentouse en Vigo con 3 puntos de distancia sobre o play out e coas baixas por lesión de David Vilán e Martín Ochoa; ademais de Rubén López, citado co primeiro equipo.
Por contra, Óscar Gilsanz recuperou a Jairo após cumprir ante o CD Guijuelo o partido de sanción.
Tamén foi titular Mario Nájera, protagonista durante a semana ao renovar o seu contrato co Dépor até o ano 2027, nunha firma aposta do club por #ANOSACANTEIRA.
O partido arrincou con igualdade no centro do campo e escasas ocasións de gol.
A primeira gran oportunidade foi unha cabezada de Davo ao saque dunha falta no minuto 21. Hugo Ríos sacou cunha gran parada.
Respondeu Nájera no minuto 27 noutro saque de falta na frontal que se estrela no traveseiro. O rebote cae a Álex Pereira que marca sen oposición aínda que o colexiado do partido anulou o gol por fóra de xogo do defensor branquiazul.
Mario adiantou ao Coruxo FC case á media hora. Recibiu no pico da área, marchouse de Jairo e lanzou un duro disparo ao recanto esquerdo da portería fabrilista. Imposible para Hugo Ríos.
A primeira parte acabou cunha gran ocasión viguesa. Johan recibe no corazon da área, libre de marca, e o seu disparo raso sácao Lache baixo paus co tacón.
Após o descanso, pronto Óscar Gilsanz moveu o banco en busca dunha reacción.
O xuvenil Adrián Guerrero, que debutou en Segunda Federación a pasada fin de semana, e Mati Castillo relevaron a Nájera e Puerto.
Custáballe crear oportunidades ao filial deportivista ante un conxunto vigués experimentado sobre todo no seu campo en aguantar co marcador a favor.
A falta dun cuarto de hora, Jorge e Mardones relevaron a Álex Pereira e Kevin.
E chegou o providencial tempo de desconto.
Após un saque de esquina de Diego Gómez e de varios rexeites na área o balón cae a Álex Alfaro, co sangue frío suficiente para colocar o balón raso fóra do alcance do enxame de pernas dos defensores vigueses.
Pouco despois, Jorge de chilena a punto estivo de marcar pero o seu remate estrelouse no lateral da rede.
Estaba o Fabril moito máis centrado que o Coruxo FC, tocado após o gol do empate.
E chegou o gol do triunfo fabrilista no último minuto. Diego Gómez saca unha falta que para en principio a meta Alberto. Ao porteiro escápaselle o balón, Álex Alfaro arrebátallo e ceda a Jorge, que o tenta primeiro. Mati Castillo colle o rexeite e por baixo logra un tanto que vale ouro para a permanencia.
O vindeiro domingo 28 de abril ás 12:00, o Fabril recibe ao Pontevedra CF en Abegondo.
Coruxo FC: Alberto, Borja Marchante, Dani Vidal, Guido, Davo (Andriu, min. 88), Mateo (Tomaselli, min. 65), Álex Rey (Vander, min. 88), Mario (Naveira, min. 75), Mikel Carro, Pitu e Johan
Fabril: Hugo Ríos, Lache, Álex Pereira (Mardones, min. 74), Puerto (Guerrero, min. 61), Marotías, Brais Val, Álex Alfaro, Jairo (Thymos, min. 86), Nájera (Mati Castillo, min. 61), Diego Gómez e Kevin (Jorge, min. 74)
Goles: 1-0 Mario (min. 29); 1-1 Álex Alfaro (min. 90+1); 1-2 Mati Castillo (90+5)
Árbitro: Eduardo Rodríguez García, do comité asturiano. Amoestou a Puerto (min. 20), Borja Marchante (min. 65), Jorge (min. 88), Mati Castillo (min. 90), Pitu (min. 90) e Dani Vidal (min. 90)
Incidencias: Partido correspondente á 32ª xornada no grupo 1º de Segunda Federación disputada no campo de O Vao
