O xogador deportivista Pedro Martelo foi convocado pola Federación Portuguesa para formar parte do combinado luso que acudiu a disputar o Campionato do Mundo sub-20, que comezou o pasado día 23 en Polonia.
Esta noite, Portugal xogábase o pase aos oitavos de final fronte a Sudáfrica, pero o empate a un gol resultou insuficiente para o equipo dirixido por Hélio Sousa. Pedro saltou ao céspede no minuto 68 en lugar de Nuno Santos, pero non puido cambiar o devir do partido, que xa se atopaba entón co marcador ao cabo definitivo.
O conxunto portugués abriu a súa participación o sábado 25, cunha vitoria pola mínima ante Corea do Sur. O xogador deportivista non saltou ao céspede.
Na segunda xornada, o martes 28, os lusos caeron por 0-2 ante Arxentina, que acabou sendo primeira do grupo. Pedro disputou os últimos 13 minutos, substituíndo a Miguel Luís.
Con 4 puntos e só 2 goles a favor, Portugal non puido ser un dos 4 mellores terceiros clasificados dos 6 grupos, co cal queda apeada.
Os resultados de Portugal, encadrada no Grupo F da primeira fase, foron os seguintes:
Sábado 25 de maio
PORTUGAL 1 - COREA DO SUR 0
Martes 28 de maio
PORTUGAL 0 - ARXENTINA 2
Venres 31 de maio
SUDÁFRICA 1 - PORTUGAL 1
Pedro Alves Correia anotou o tanto que deu á selección portuguesa a coroa europea hai 10 meses, na final fronte a Italia (4-3), ao cabo do torneo que serviu de clasificación para este Mundial. O dianteiro deportivista, que actualmente se atopa cedido ao Sporting Braga, suma a día de hoxe 20 partidos internacionais coas categorías inferiores de Portugal: 8 co equipo sub-19 e 12 co sub-20.
