O canteirán deportivista Hugo Novoa incorporouse á concentración da selección española sub-16 para participar desde mañá martes no Torneo Desenvolvemento UEFA en Belgrado (Serbia).
Outro cadete branquiazul, Trilli, citado inicialmente para participar con España sub-16 no Mundial de Montaigu (Francia), non poderá acudir á cita internacional debido a unha lesión.
Ambos os futbolistas pertencen ao Cadete A, aínda que Hugo disputou os últimos partidos de liga co Xuvenil A de División de Honra.
Tanto Hugo como Trilli xa participaron con España esta temporada na última edición da Copa Aegean en Esmirna (Turquía).
A anfitrioa Serbia, Eslovaquia e Ecuador serán os rivais de Hugo Novoa e España en Serbia.
Os españois debutan mañá martes 16 de abril no torneo ante Ecuador (12:00 horas).
O calendario de partidos dos españois, todos eles no Stara Pazova Stadium, é o seguinte:
Martes 16 de abril 12:00: ESPAÑA - ECUADOR
Xoves 18 de abril 14:15: SERBIA - ESPAÑA
Sábado 20 de abril 12:15: ESLOVAQUIA - ESPAÑA
Presenza habitual esta temporada en Las Rozas
Esta campaña, ademais de Hugo Novoa e Trilli, foron citados os seguintes canteiráns deportivistas para diferentes categorías da selección española:
- Mujaid (central do Fabril): Xogos do Mediterráneo coa sub-19
- Juan Rodríguez Lima (central do Xuvenil B) e Íker Piedra Blanco (porteiro do Xuvenil B): Adestramentos coa sub-17 e amigable ante Italia o primeiro deles
- Sergio Bernárdez (centrocampista do San Tirso SD): Sportchain AGS Cup e Torneo Pinatar Arena coa sub-15
Por conseguinte, a factoría de Abegondo aos poucos vaise convertendo nun referente para os diferentes seleccionadores nacionais.