O Dépor ABANCA conquistou o Trofeo Concello de Sanxenxo ao imporse (0-2) no campo Novo San Pedro de Vilalonga ao Viajes InterRías FF, de Segunda Federación.
O choque foi a cuarta cita de pretemporada. Até a data as pupilas de Irene Ferreras competiron a bo nivel no Trofeo Cidade de Gaia de Portugal ante o Valadares Gaia FC (2-4), no Teresa Herrera ante outro equipo luso, o FC Famalicão (2-2 e 5-3 por penaltis) e ante o SD Eibar (1-2) en Asturias, na súa única derrota este verán.
O encontro púxose de cara aos 17 minutos. Eva Dios anota o primeiro de penalti cometido sobre Millene.
Ao descanso chegouse con este marcador favorable ás deportivistas.
O Dépor ABANCA levou o peso do partido ante un bo rival, a pesar de ser de inferior categoría. O Viajes InterRias FF buscou as costas das defensas deportivistas en balóns longos, circunstancia que obrigou a traballar a Nuria Gómez.
Tralo descanso chegou o carrusel de cambios pero sen variar a tónica do partido: dominio do xogo por parte das branquiazuis.
Carlota Suárez de cabeza e Marta Charle, cun disparo cruzado, tiveron as mellores opcións nestes segundos 45 minutos antes da sentenza definitiva, o gol precisamente de Charle no minuto 87. A atacante deportivista recibiu de Carlota, internouse na área e de potente disparo bateu a meta rival. Punto e final.
A boa noticia protagonizouna Samara Ortiz, que disputou os seus primeiros minutos nesta pretemporada despois de superar un proceso vírico que lle impediu xogar nos tres primeiros partidos.
Deportivo ABANCA: Nuria Gómez, Patri López (Paula Monteagudo, min. 46), Cris (Paula Novo, min. 60), Raquel García (Inés Altamira, min. 46), Lorena Reina, Henar (Paula Gutiérrez, min. 46), Eva Dios (Samara, min. 75), Millene (Laura Fernández, min. 60), Marta Rico, Tati (Marta Charle, min. 75) e Aroa Guerra (Carlota Suárez, min. 60).
Finalizado o choque ante o Viajes InterRías FF, o cadro deportivista adéstrase mañá luns 22 de agosto ás 10:00 en Abegondo e descansa o martes 23.
A próxima cita de pretemporada será o Trofeo Emma Cuervo, o domingo 28 de agosto ás 18:00 horas no Estadio Pepe Barrera de Ribadeo (Lugo).
O calendario de pretemporada do Dépor ABANCA, cos resultados dos partidos xa xogados, é o seguinte:
Valadares Gaia FC 2 - Deportivo ABANCA 4 (Carlota Suárez, Millene -2- e Eva Dios)
Deportivo ABANCA 2 (Paula Gutiérrez e Inés Altamira) - FC Famalicão 2. A penaltis: 5-3 (X Trofeo Teresa Herrera)
Deportivo ABANCA 1 (Ainhoa Marín) - SD Eibar 2
Viajes InterRías FF 0 - Deportivo ABANCA 2 (Eva Dios e Marta Charle) (Trofeo Concello de Sanxenxo)
Deportivo ABANCA - Real Oviedo (Trofeo Emma Cuervo), domingo 28 de agosto, 18:00 horas, Estadio Pepe Barrera (Ribadeo, Lugo)
Deportivo ABANCA - Athletic Club B, sábado 3 de setembro, 18:00 horas, Campo Municipal Les Caleyes (Villaviciosa, Asturias)
