O deportivista Mujaid, convocado pola Selección Española sub-18 para os Xogos do Mediterráneo
O central xuvenil do RC Deportivo, Mujaid Salick, foi convocado pola Selección Española sub-18 para disputar a 18ª edición dos Xogos do Mediterráneo.
O combinado nacional, dirixido por Luis de la Fuente, concentrarase o vindeiro luns 18 de xuño, e o mércores 20 desprazarase a Tarragona, sede da presente edición dos Xogos.
España quedou encadrada na Primeira Fase no grupo A, con Alxeria e Macedonia. O seu calendario de partidos é o seguinte:
Venres 22 de xuño 13:00: ALXERIA - ESPAÑA, en Calafell
Domingo 24 de xuño 20:00: ESPAÑA - MACEDONIA, no Camp Nou de Reus
Os dous primeiros acceden ás semifinais, que se xogarán o xoves 28 de xuño.
Mujaid Salick foi unha das boas noticias en #ANOSACANTEIRA na temporada recentemente finalizada. Despois de adestrarse varios días co primeiro equipo ás ordes de Clarence Seedorf, o técnico holandés fíxoo debutar no Estadio ABANCA-RIAZOR ante o Villarreal na penúltima xornada de LaLiga Santander, o pasado 12 de maio.
Unha semana máis tarde, o domingo 20, o canteirán cumpría o seu soño de xogar de titular co Deportivo en Primeira División, en Mestalla ante o Valencia CF.