O Deportivo ABANCA saborea esta semana o título ligueiro no grupo 1º de Segunda División Nacional conquistado a pasada fin de semana en Vigo ante o Sárdoma CF, co consecuente pasaporte ao playoff de ascenso á Liga Iberdrola.
Hai parón ligueiro, pero a competición non para. Toca disputar a 3ª xornada no grupo 1º da Copa Galicia de Segunda División Nacional, mañá domingo 7 de abril en Santiago fronte ao Victoria FC (16:00 horas, Santa Isabel).
Será baixa Teresa Abelleira, concentrada con España sub-19 no Mini Torneo Elite de Santiago de Compostela. Ademais Kika, Alba Merino, Michele Romero, Nuria Rábano e Laura están lesionadas.
As deportivistas, após 2 partidos copeiros, lideran o grupo con 6 puntos. Segundo marcha o Atlántida de Matamá, con 3 puntos; mentres que Victoria FC e Sárdoma CF contan con 1 punto.
Manu Sánchez, técnico deportivista, tirou do Deportivo ABANCA B para a convocatoria, con até 6 xogadoras do filial, sen competición esta fin de semana: Jessica, Patri López, Sofía, Laura Rivas, María Calvo e Carlota.
Completan a lista: Curbelo, Iris, Gaby, Peke, Cris, Miriam, Patri Díaz, Ali Muñoz, Erika, Raquel, Yamamoto e Mérida.
