O RC Deportivo realizará a súa concentración de pretemporada na localidade lucense de Vilalba entre o domingo 29 de xullo e o venres 3 de agosto.
O cadro deportivista chegará o día 29 pola tarde á capital chairega, onde se instalará no Hotel Spa Attica 21.
Os xogadores branquiazuis traballarán sobre o céspede no Campo da Magdalena, ademais de facelo nas instalacións do hotel, o luns 30 e o martes 31. O mércores 1 unicamente terán adestramento matinal, xa que pola tarde desprazaranse a Bembibre (León) para enfrontarse ao Real Valladolid nun encontro amigable que comezará ás 20:00 horas.
Após regresar a Vilalba esa mesma noite, o equipo volverá traballar na Magdalena o xoves 2 e o venres 3, aínda que este último día soamente pola mañá. Trala comida, os futbolistas abandonarán o Hotel Spa Attica 21 para regresar á Coruña.
Desde a súa estrea na Temporada 1986-87, será a vixésimo primeira vez que Vilalba acolla a concentración de pretemporada do equipo branquiazul.
