O Infantil do Deportivo quedou encadrado no subgrupo B norte da Liga Galega. Os rivais iniciais do conxunto branquiazul son os seguintes: Racing de Ferrol, Galicia Caranza, SDCR Narón O Freixo, SD O Val, SDC Residencia, CD Castro, SD Viveiro, CD Lugo, Ural Español CF, San Tirso SD e Oza Juvenil SD.
Nesta primeira parte da competición, o formato será de liga todos contra todos en cada subgrupo, a dobre volta. En total son pois 22 xornadas. Os cinco primeiros xogarán a Fase polo Título cos cinco primeiros clasificados do subgrupo B norte. O resto disputará unha Fase pola Permanencia.
Na Fase polo Título, o formato será de liga a dobre volta pero só contra os cinco equipos clasificados do subgrupo B norte, cun total de dez xornadas. Os primeiros de cada subgrupo da primeira fase arrancan esta segunda parte da competición con cinco puntos; os segundos con tres; os terceiros con dous; os cuartos clasificados cun; e os quintos con cero puntos. Ao concluír esta segunda fase, os dous primeiros xogarán as semifinais contra os dous primeiros do grupo sur, a partido único en casa do mellor clasificado. A final será nunha sede que ditaminará a Federación Galega.
No Grupo pola Permanencia, os equipos quedarán divididos en tres novos subgrupos (D1, D2 e D3), cun formato de liga a dobre volta todos contra todos. Os sextos clasificados de cada subgrupo da primeira fase comezan agora con sete puntos; os sétimos con seis; os oitavos con cinco; os novenos con catro; os décimos con tres; os undécimos con dous; os duodécimos cun; e o décimo terceiro con cero puntos. O último clasificado do subgrupo D1, D2 e D3 perderá a categoría, do mesmo xeito que o peor penúltimo.
O Infantil branquiazul comezará os adestramentos de pretemporada o próximo 24 de agosto.
