Northius, o grupo galego líder en formación en España, reforza o seu compromiso coa cidade da Coruña mediante a renovación do seu acordo de colaboración co RC Deportivo até o final da presente temporada.
"Para o RC Deportivo é moi importante contar co respaldo das grandes empresas da nosa cidade. Northius é o exemplo do arraigamento do tecido empresarial coruñés e dunha empresa de referencia no seu sector co Dépor. Para nós é un orgullo poder ir da man con eles cara á consecución dos nosos obxectivos", afirma o presidente do RC Deportivo, Álvaro García Diéguez.
"En Northius estamos moi orgullosos de poder renovar o noso vínculo co Dépor e seguir apoiando ao club da cidade que nos viu nacer", afirma Carlos Díaz, presidente de Northius. "A cidade da Coruña está completamente envorcada en que o Dépor volva ao lugar que se merece e, desde Northius, queremos achegar o noso gran de area neste ambicioso obxectivo que estamos seguros de que se cumprirá", conclúe Díaz.
Con este acordo, Northius continúa vinculándose social, cultural e deportivamente coa súa cidade natal e sede, onde conta con 452 empregados, preto da metade do seu cadro. O grupo Northius conta con máis de 35.000 novas matriculacións cada ano nas súas institucións educativas, un feito que lle permite situarse como a compañía líder en formación e preparación dos profesionais do futuro no noso país.
