Primeira derrota dun Deportivo que fixo todo para gañar (2-3)

No seu primeiro achegamento tomou vantaxe o Sporting, ao cabecear Tony Sanabria ao bordo da área moza un centro de Lora desde o extremo dereito do ataque asturiano. Catro minutos despois, nunha xogada practicamente calcada e protagonizada polos mesmos xogadores, o conxunto xixonés colocaba o 0-2 no marcador. Nun dicir amén, o Dépor víase con dous goles en contra.

 

Non merodeó o equipo coruñés a área rival con perigo ata o minuto 15, cando un envelenado disparo de Luís Alberto desviouno a córner Alberto García. Lucas botou o saque de esquina pechado ao primeiro pau, onde Juanfran peiteouno para subir o primeiro tanto deportivista.

 

Durante uns minutos, os branquiazuis encerraron ao seu rival, aínda que non chegaron a esixir novas intervencións a Alberto García a pesar de xerar numerosas situacións de perigo.

 

Foi tras un novo saque de esquina cando chegou o empate. Despois de varios rexeites, o balón caeu a pés de Mosquera, que abriu á esquerda para Luís Alberto. O gaditano recortou cara a dentro para acomodarse o esférico á súa perna boa e cun disparo á cepa do poste dereito bateu ao cérbero sportinguista.

 

Cinco minutos despois, Sidnei marcou noutra xogada de estratexia, esta vez unha falta lanzada por Lucas desde tres cuartos, pero o tanto foi anulado por fóra de xogo.

 

Esa acción supuxo o preludio do terceiro gol visitante. Álex Menéndez, tras un servizo de Halilovic ao extremo esquerdo do ataque xixonés, culminou un contragolpe ante a saída de Lux.

 

Os últimos minutos da primeira metade foron os únicos de respiro para ambos os equipos desde o asubío inicial. Ao descanso chegouse coa pouco común efectividade total do Sporting: tres disparos, tres goles.

 

Ao regreso de vestiarios, Fayçal gozou da primeira oportunidade para os deportivistas, cun disparo afastado con efecto que atrapou Alberto García sen excesivas dificultades. O porteiro branquivermello tívoo máis complicado segundos despois, para repeler un durísimo disparo de Lucas que acabou estrelándose no poste.

 

Lux interveu por vez primeira no minuto 56, a disparo de Halilovic. Dous minutos despois, Luís Alberto realizou unha gran manobra dentro da área pero o seu disparo marchouse á esquerda do portal xixonés. De novo o extremo esquerdo tentouno pouco despois tras recoller un balón perdido na área para empalmar un remate que Alberto García só puido deter en dous tempos.

 

Os xogadores branquiazuis tentárono de todas as formas posibles, aínda que as mellores oportunidades continuaron chegando en accións a balón parado, como un disparo de Arribas e outro de Mosquera. O Sporting esperaba acazapado e co coitelo entre os dentes para non deixar unha físgoa.

 

Fede Cartabia, na súa primeira acción ao ingresar no terreo de xogo en lugar de Fayçal, buscou o empate cun forte zurdazo que o porteiro visitante só puido despexar. Xa ao fío do minuto 90, Pedro Mosquera tamén o tentou desde a longa distancia pero o seu potente lanzamento foi excesivamente centrado.

 

RC Deportivo: Lux, Laure, Arribas, Sidnei, Navarro (Luisinho, min. 61), Mosquera, Borges, Juanfran (Jonathan Rodríguez, min. 61), Fayçal (Fede Cartabia, min. 81), Luís Alberto e Lucas.

 

Sporting de Xixón: Alberto García, Lora, Luís Hernández, Bernardo, Halilovic (Carmona, min. 66), Sergio Álvarez, Nacho Cases (Mascarell, min. 81), Álex Menéndez, Guerreiro (Pablo Pérez, min. 77) e Tony Sanabria.

 

Goles: 0-1 Tony Sanabria (min. 3); 0-2 Tony Sanabria (min. 7); 1-2 Juanfran (min. 15); 2-2 Luís Alberto (min. 27); 2-3 Álex Menéndez (min. 33).

 

Árbitro: Prieto Igrexas (C. Navarro). Amoestou a Nacho Cases (min. 60), Carmona (min. 69), Fayçal (min. 71), Sidnei (min. 84) e Luisinho (min. 90).

 

Incidencias: partido da 4ª xornada da liga BBVA disputado en Riazor ante 25.801 espectadores.