O mellor partido a día de hoxe en Primera Federación Iberdrola, segundo contra primeiro na clasificación, poderase ver mañá sábado ás 12:00 (Youtube RC Deportivo) na Cidade Deportiva.
O Dépor ABANCA recibe ao FC Barcelona B en partido correspondente á 23ª xornada en Primeira Federación Iberdrola.
A última xornada de liga deixou ás Nosas con 41 puntos, a 2 puntos das xogadoras culés, líderes con 43 puntos e que non poden ascender a Primeira División pola súa condición de filial azulgrana. Por detrás veñen o Cacereño Feminino e a SD Eibar, ambos os igualados con 39 puntos.
Irene Ferreras ten á súa disposición a todo o cadro salvo Carlota Suárez, na recta final da súa recuperación dunhas molestias nun aductor que lle impediron traballar co grupo durante boa parte da semana.
Paula Monteagudo será a representante de #ANOSACANTEIRA na convocatoria de 18 futbolistas feita pública ao finalizar a última sesión preparatoria previa ao partido, curta de duración pero de alta intensidade.
No choque entre ambos os equipos disputado na Cidade Deportiva Joan Gamper o pasado 19 de novembro, o triunfo foi azulgrana ademais cun gol en propia meta no minuto 87.
Pero mañá sábado, o Dépor ABANCA contará con #ANOSAFORZA, tal e como presumiu Irene Ferreras en rolda de prensa esta mesma mañá: "Creo que vai vir moita xente e iso é un extra para nós. Imos tentar enchernos de toda esa enerxía, de todo ese apoio, desta aura bonita que nos envolve en Abegondo e imos tentar brindarlles a #ANOSAFORZA unha vitoria das boas contra un dos mellores rivais da categoría que a nivel clasificatorio deixaríanos nun moi bo lugar".
Lonxe de Barcelona, o filial azulgrana gañou esta temporada ao Granada CF (2-3), Rayo Vallecano (0-3), RCD Espanyol (1-2), Cacereño Feminino (0-2) e Athletic Club B (0-3); empatou co Córdoba CF (1-1) e DUX Logroño (2-2); e caeu na súa visita ao Real Oviedo (3-2), SD Eibar (2-0), CDF Osasuna (1-0) e SE AEM (2-0).
O Club mantén activo o protocolo de apertura con control de accesos á Cidade Deportiva.
Todo o público debe retirar entrada, até esgotar aforo e sen ningún custo adicional para todas as persoas socias do RC Deportivo que o tramiten formalmente a través da web bancada.rcdeportivo.es, na que deberán introducir a súa ID de socio e 4 últimos números do DNI. A continuación, seleccionar unha localidade libre na bancada e posteriormente completar os seus datos de contacto e a dirección de correo electrónico onde recibir a entrada. Con eses mesmos datos doutras persoas socias, unha única persoa pode retirar máis dunha entrada nunha soa xestión e, deste xeito, seleccionar asentos contiguos ou próximos.
Este procedemento ten dous fins: poder solicitar e recibir a entrada e, ademais, levar un control de repartición, localización e aforo na instalación. O RC Deportivo solicita que unicamente tramiten a entrada aquelas persoas socias que vaian poder acudir aos partidos, para evitar que queden afeccionados sen poder asistir unha vez completado a repartición do aforo nun proceso 100% telemático.
A xestión pode realizarse desde a publicación desta nota informativa e até completar o aforo. As socias e socios do RC Deportivo terán prioridade para a retirada da súa entrada gratuíta até o mércores ás 23:59 h. A partir dese momento, se houbese aforo aínda dispoñible, habilitarase simultaneamente o sistema de venda de entradas para o público en xeral, a través da mesma plataforma en bancada.rcdeportivo.es e seguindo o preceptivo sistema de rexistro e pago de localidade. O prezo de cada entrada para cada partido para afeccionados sen carné do RC Deportivo é de 10 euros.
Finalizado o choque, o Deportivo ABANCA adestrarase de novo en Abegondo o domingo 19 ás 09:00 horas.
