Como é habitual dous días antes de cada partido, o primeiro equipo, xa sen Celso Borges pero co central xuvenil Mujaid, realizou unha suave sesión de adestramento no campo 2 da Cidade Deportiva de Abegondo.
Uns rondos foron todo o traballo realizado no céspede. De regreso no vestiario houbo ximnasio e tarefas de recuperación.
Mañá sábado, o equipo está citado ás 12:00 horas en Abegondo. Ao finalizar, Clarence Seedorf dará a lista de convocados para viaxar pola tarde a Valencia, para, este domingo 20 de maio (12:00 horas, Bein LaLiga), visitar ao conxunto che en Mestalla, no peche da temporada 2017-18.
