O Deportivo céntrase xa no Albacete e no Estadio Carlos Belmonte, que servirá este venres 17 de agosto (22:00 horas, Gol) como escenario para arrancar LaLiga 1|2|3.
Esta mañá, Natxo González reuniu aos seus futbolistas por espazo de media hora na sala de vídeo da Cidade Deportiva.
Xa sobre o céspede, após un quecemento, o primeiro cadro, ademais dos fabrilistas Carlos López e Diego Villares, tiveron un partido táctico no campo 2.
O traballo concluíu con repaso de accións a balón parado, fundamentalmente saques de esquina. Carles Gil, Diego Caballo, Quique González e Pedro Sánchez completaron a mañá con ensaio de lanzamento directo de faltas.
Non estivo nas instalacións deportivistas Celso Borges, con permiso; e Guilherme tivo un adestramento específico co readaptador, Fran Molano.
Mañá xoves 16 de agosto, os futbolistas adestraranse ás 10:30 horas en Abegondo. Ao finalizar, Natxo González dará a lista de convocados que partirán ao mediodía, vía Madrid, rumbo á cidade manchega.
