Última sesión semanal no Dépor esta mañá antes do descanso de mañá luns
Os Nosos adestráronse na Cidade Deportiva hoxe domingo 15 de maio na última sesión da semana e antes da xornada de descanso de mañá luns 16 de maio.
Como é habitual nos días post-partido, os titulares onte en ABANCA-RIAZOR ante o CD Tudelano tiveron tarefas de recuperación, con carreira continua, estiramentos, ximnasio e paso pola padiola dos fisioterapeutas.
Para os demais a xornada foi de alta intensidade, cun quecemento, rondos e fútbol en espazo reducido. A este grupo de futbolistas sumouse William de Camargo, que xogou onte a primeira metade ante o equipo navarro.
Víctor, Álvaro Rey e Trilli tiveron adestramento personalizado; mentres que Noel, Yeremay e Alberto, ademais do citado Trilli, foron a representación de #ANOSACANTEIRA esta mañá.
A próxima cita ligueira para o Dépor será o sábado 21 de maio ás 18:30, en horario unificado, ante o Real Valladolid Promesas no Anexo ao Estadio José Zorrilla. Será a 37ª xornada, penúltima, na liga.