O Deportivo dá a benvida ao ano 2022 mañá domingo 9 de xaneiro ás 12:00 en ABANCA-RIAZOR (Footters) ante o CF Talavera, en partido correspondente á 18ª xornada, penúltima da primeira volta, do grupo 1º de Primeira RFEF.
En plena sexta onda da pandemia de COVID-19, e con multitude de casos en todos os equipos do fútbol español en todas as categorías, que mesmo obrigaron a aprazar por exemplo a xornada enteira desta fin de semana no grupo galego de Tercera RFEF, Borja Jiménez ten a todo o seu cadro apto para competir, ademais dos canteiráns Noel, Trilli e Yeremay.
Na listaxe de 24 que hoxe despois de adestrar en ABANCA-RIAZOR facilitou Borja Jiménez atópase tamén Álvaro Rey, o futbolista desexado desde hai varias temporada pola Dirección Deportiva branquiazul e que se puxo a tiro xusto poucos días antes de abrirse este mercado de inverno.
O atacante sevillano, que se adestra con normalidade desde o seu primeiro día en Abegondo, está pendente iso si dun último trámite burocrático coa Federación de Bolivia que se podería solucionar nas próximas horas para que poida ser aliñado mañá, caso de consideralo así o corpo técnico.
Esta mañá, após un quecemento con rondos, Borja Jiménez dispuxo na sesión de traballo un partido a metade de campo e un ensaio de accións a balón parado.
Os deportivistas preséntanse a esta primeira cita como líderes do grupo con 37 puntos por 33 do segundo clasificado, o Real Racing Club, que recibe en El Sardinero mañá domingo ás 17:00 ao UD San Sebastián de los Reyes.
Pola súa banda, o CF Talavera no que militan os ex canteiráns David Añón e Edu Sousa, está nunha situación máis incómoda na táboa: décimo quinto con 17 puntos, 3 puntos por encima da zona de perigo. No entanto, un rival que o pasado 28 de novembro chegaba a ABANCA-RIAZOR en situación parecida, o Athletic Club B, foi capaz de arrancar un empate (1-1) en #ANOSACASA.
O seu técnico, Víctor Cea, manifestou en rolda de prensa que séntense "privilexiados por enfrontarnos a un equipo como o Deportivo. E non é un feito puntual como o partido da Copa do Rei ante o Real Betis senón que estamos a competir na mesma liga que o Deportivo. Cando roldaba a maioría de idade, vía ao Dépor xogando a Champions e pelexando títulos de liga. Contra ese Club vaise a enfrontar o CF Talavera".
Do Dépor destaca "o estable que é. Aínda que lle domines e estéase dando un partido máis do que queiramos nós, non se vai a desorganizar, desestabilizar, non vaiche a regalar o partido senón que vas ter que traballalo moito. E non vaiche a permitir que ti afrouxes, que cometas algún tipo de irregularidade no partido. Penalízacho moito."
Cre que o cadro branquiazul "é dos mellores de Primera RFEF. É un cadro moi completo, capaz e complementario, que lle permite ser moi versátil no seu xogo e a pesar de ter unha baixa, dúas ou tres, seguir tendo futbolistas de máis nivel quizais".
Lonxe do seu campo, esta temporada o CF Talavera caeu en Badaxoz (2-0), Santander (5-1), Logroño ante a SD (3-2) e UD (1-0), e Vigo (2-0); mentres que foi capaz de puntuar en León (1-2), Tudela (0-2) e Bilbao (0-1).
Aviso importante a #ANOSAFORZA
Seguindo as indicacións que publicou a Consellería de Sanidade da Xunta de Galicia e que expresamente trasladou ao RC Deportivo, informamos a todas as persoas que vaian acudir mañá ao Estadio ABANCA-RIAZOR o seguinte:
Como consecuencia da publicación no DOG o 17 de decembro de 2021 (nº 241), da Orde da Consellería de Sanidade da Xunta de Galicia, de 14 de decembro de 2021, pola que se establecen medidas preventivas de seguridade sanitaria consistentes na exhibición de documentación que acredite o cumprimento de determinados requisitos para o acceso a certos establecementos e prorróganse diversas ordes como consecuencia da evolución da situación epidemiolóxica derivada da COVID-19 en Galicia, o RC Deportivo de La Coruña, SAD vese obrigado a esixir a todas persoas maiores de 12 anos para acceder ao estadio ABANCA-RIAZOR, a seguinte documentación, ademais do seu DNI, un dos documentos aos que se refiren os seguintes ordinales:
1º. Certificado de vacinación (en formato papel ou en formato dixital) acreditativo de que recibiron a pauta completa dunha vacina contra a COVID-19 para a que se concedeu autorización de comercialización na Unión Europea (BioNTech, Pfizer; Johnson & Johnson; Moderna; Novavax; Oxford, AstraZeneca).
2º. Que dispoñen dunha proba diagnóstica negativa realizada nas últimas 72 horas, no caso de PCR, e 48 no caso do test de antígenos. No caso do test rápidos de antígenos, deberán estar enumerados na lista común e actualizada de test rápidos de antígenos da COVID-19 establecida sobre a base da Recomendación 2021/C 24/01, do Consello de Europa (consultar lista).
3º. Que a persoa se recuperou dunha infección polo SARS-CoV-2 nos últimos 6 meses. Para iso a persoa deberá ser diagnosticada como caso confirmado da COVID-19 hai 11 días ou máis mediante unha proba PCR, non sendo válido outro tipo de test.
NON PODERÁN ACCEDER AO ESTADIO ABANCA-RIAZOR as persoas maiores de 12 anos que non acheguen algún dos documentos sinalados anteriormente, para que o persoal do Club poida realizar a comprobación á que vén obrigado legalmente.
Debido ás esixencias da norma e ás comprobacións que temos que realizar, é posible que se retarde o acceso ao Estadio, polo que suxerimos que se acuda con polo menos 30 minutos de antelación, e infórmase que desde as 11:00 horas será posible acceder a ABANCA-RIAZOR.
