O Fabril recibe mañá domingo 14 de abril ás 17:00 (Youtube RC Deportivo) en Abegondo a outro aspirante ao play off de ascenso como hai 15 días o UP Langreo. Neste caso trátase do CD Guijuelo, en choque correspondente á 31ª xornada en Segunda Federación.
Os resultados da última xornada, coa derrota 3-2 ante o CD Cayón en Cantabria, deixaron aos fabrilistas en 12ª posición da táboa con 36 puntos.
Óscar Gilsanz explica que "as vitorias e as derrotas recíbense de distinta maneira. Un vestiario cando gana está eufórico e cando perde, máis cabizbajo pero a medida que vai pasando a semana, analizando cos mozos as circunstancias dos partidos, a nosa función é preparar ao equipo para a seguinte competición, neste caso o partido do domingo ante o CD Guijuelo. O ánimo xa está recuperado".
Para o partido será baixa Jairo, que viu dobre cartón amarelo a pasada fin de semana; do mesmo xeito que Martín Ochoa, cunha lesión muscular no recto anterior da súa perna esquerda; e David Vilán.
Tampouco estará Rubén López, hoxe co primeiro equipo en Teruel.
O técnico fabrilista, que recupera a Lache, advirte que "se algo mostrou este equipo é que máis aló dos nomes o equipo sempre dá a cara, sempre compite. Nese sentido estamos tranquilos de que os xogadores que vaian xogar con diferentes condicións van dar un bo nivel, a competir en boas condicións".
Os xuvenís Kevin Sánchez, Mardones, Manu Berrocal e Guerrero completan a citación de 20 futbolistas.
Pola súa banda, o CD Guijuelo, que a pasada fin de semana empatou (1-1) no seu campo co Ourense CF, é 4º na táboa con 47 puntos.
Lonxe do Municipal Luis Ramos esta temporada os salmantinos gañaron ao CD Cayón (1-2), Real Valladolid Promesas (0-2), Rayo Cantabria (1-2) e Arandina CF (0-1); empataron co Real Avilés Industrial (2-2), CD Covadonga (0-0), UP Langreo (1-1), Coruxo FC (0-0); e perderon co Zamora CF (1-0), Pontevedra CF (5-0), Marino de Luanco (1-0), Ourense CF (1-0), Racing Villalbés (2-1), Real Oviedo Vetusta (1-0) e SD Compostela (1-0).
O seu técnico, Mario Sánchez, lembrou que "fai dúas xornadas falabamos de que o Fabril xogaba contra o UP Langreo con opcións a, se gañaba, engancharse ao grupo de arriba. Despois encadeou esas dúas derrotas que o mandaron a loitar por non meterse nese carro de abaixo e saír de aí. Como adoitan ser os finais de liga case sempre, neste grupo moi entretido e con partidos complicados para todo o mundo porque todo o mundo está a xogarse cousas".
Pide aos seus futbolistas estar "concentrados en facer as cousas ben, seguir competindo. Se comparamos, este ano chegamos con mellor fondo de armario a este final de temporada. Hai xente que acaba de saír de lesión, que está recuperada e o normal é que non volva recaer agora".
O Club mantén activo o protocolo de apertura con rexistro de asistentes da Cidade Deportiva.
Poden retirar entradas dispoñibles, até esgotar as localidades e sen ningún custo adicional, todos os socios e socias do RC Deportivo que o tramiten formalmente a través da web bancada.rcdeportivo.es, na que deberán introducir a súa ID de socio e os 4 últimos números do DNI. A continuación, seleccionar un asento e posteriormente completar os seus datos de contacto e a dirección de correo electrónico onde recibir a entrada.
Con eses mesmos datos doutras persoas socias, unha única pode retirar máis dunha entrada nunha soa xestión e, deste xeito, seleccionar asentos contiguos ou próximos.
Este procedemento ten dous fins: poder solicitar e recibir a entrada e, ademais, levar un control de repartición e localización na instalación.
O RC Deportivo solicita que unicamente tramiten a entrada aqueles socios e socias que vaian poder acudir, para evitar que queden afeccionados sen poder asistir unha vez completado a repartición da bancada nun proceso 100 % telemático.
Tamén está habilitado simultaneamente o sistema de venda de entradas para o público en xeral, a través da mesma plataforma en bancada.rcdeportivo.es e seguindo o preceptivo sistema de rexistro e pago de localidade. O prezo de cada entrada para afeccionados sen carné do RC Deportivo é de 10 euros.
